(Russia Earthquake) रशिया आणि जपानच्या किनारपट्टी भागात बुधवारी (30 जुलै) सकाळी जोरदार समुद्राखालचा भूकंप झाला असून रिश्टर स्केलवर त्याची तीव्रता तब्बल 8.8 इतकी नोंदवली गेली आहे. या भूकंपानंतर दोन्ही देशांमध्ये त्सुनामीचा इशारा देण्यात आला आहे. त्यामुळे संपूर्ण भागात सतर्कता आणि भीतीचे वातावरण पसरले आहे.

भूकंपाचे केंद्र रशियाच्या कामचटका द्वीपकल्पाजवळील कुरिल बेटांच्या परिसरात समुद्राच्या खोल भागात असल्याचे अमेरिकन भूगर्भीय सर्वेक्षण संस्थेने (USGS) स्पष्ट केले आहे. यामुळे त्सुनामी लाटांची शक्यता अधिकच वाढली असून, जपानच्या हवामान विभागाने पूर्व किनाऱ्यालगतच्या भागात सुमारे 1 मीटर उंचीच्या लाटांचा इशारा दिला आहे.

जपान सरकारने परिस्थिती गांभीर्याने घेत पंतप्रधान फुमिओ किशिदा यांच्या नेतृत्वाखाली आपत्कालीन बैठक बोलावली आहे. त्सुनामी अलर्टनंतर किनारपट्टी भागातील नागरिकांना सुरक्षित स्थळी हलवण्याचे काम युद्धपातळीवर सुरू करण्यात आले आहे.

रशियातील स्थानिक प्रशासनाकडूनही त्सुनामी अलर्टमुळे किनाऱ्यालगतच्या गावांमध्ये हाय अलर्ट जारी करण्यात आला असून, चार तास अत्यंत निर्णायक असतील, असा इशारा अधिकाऱ्यांनी दिला आहे.

रशियाच्या कामचटका भागामध्ये यापूर्वीही भूकंपाचे अनेक झटके जाणवले आहेत. नुकताच 20 जुलै रोजी येथे 7.4 रिश्टर तीव्रतेचा भूकंप झाला होता. मात्र, आजचा भूकंप अधिक तीव्र आणि त्सुनामीसारख्या संभाव्य आपत्तीच्या पार्श्वभूमीवर अधिक धोकादायक मानला जातोय.

जपान, रशिया तसेच अमेरिकेच्या किनारपट्टी भागातील लोकांना त्वरित सुरक्षित स्थळी हलवण्याचे आदेश जारी करण्यात आले असून, त्सुनामीमुळे जीवित व वित्तहानी होऊ नये यासाठी सरकार आणि स्थानिक प्रशासन सज्ज आहे. दरम्यान, सोशल मीडियावर या भूकंपाचे काही धक्कादायक व्हिडीओ आणि फोटो व्हायरल होत आहेत.