बांगलादेशच्या मिमेनसिंग शहरातील भालुका परिसरात संतप्त जमावाने ईशनिंदा आरोप लावून हिंदू नागरिक दिपू चंद्र दास (३०) यांची बेदम मारहाण करून हत्या केली आणि मृतदेह झाडाला बांधून पेटवून दिला. गुरुवारी रात्री नऊ वाजता घडलेल्या या घटनेमुळे सांप्रदायिक तणाव वाढला असून, बीबीसी बांगला आणि स्थानिक माध्यमांनी याची पुष्टी केली आहे. कापड कारखान्याचा कामगार असलेल्या दास यांच्या भाड्याच्या घराजवळ जमावाने त्यांना पकडले आणि मारहाणीत त्यांचा मृत्यू झाला.
शरीफ उस्मान हादी मृत्यूनंतर हिंसाचाराचा उद्रेक
‘इन्कलाब मंच’चे युवा नेते शरीफ उस्मान हादी यांच्या मृत्यूनंतर बांगलादेशात आंदोलने तीव्र झाली असून, जाळपोळ आणि हिंसेने परिस्थिती बिघडली आहे. संतप्त आंदोलकांनी ‘प्रोथोम अलो’ आणि ‘डेली स्टार’ वृत्तपत्रांच्या कार्यालयांना आग लावली, तर माजी पंतप्रधान शेख हसीना आणि आवामी लीगशी संबंधित मालमत्तांवर दगडफेक केली. भारतीय दूतावासाशी निगडित कार्यालयांवर मोर्चा काढण्यात आला असून, हादी यांच्या मारेकऱ्यांना कठोर शिक्षा देण्याची मागणी जोर धरली आहे.
पोलिसांकडून नियंत्रण, गुन्हा दाखल प्रलंबित
भालुका पोलीस ठाण्यातील अधिकारी मिया यांनी सांगितले की, घटनास्थळी धाव घेऊन परिस्थिती नियंत्रणात आणली असली तरी अद्याप गुन्हा दाखल झालेला नाही. दास यांच्या नातेवाईकांचा शोध सुरू असून, तक्रार मिळाल्यास कायद्यानुसार कारवाई केली जाईल. या हिंसेमुळे अल्पसंख्याक हिंदू समाजात भीती पसरली असून, बांगलादेश सरकारवर आंतरराष्ट्रीय दबाव वाढण्याची शक्यता आहे.