प्रसिद्ध अभिनेता, मॉडेल आदित्य सिंह राजपूतचं निधन झालं आहे. सोमवारी(२२ मे) दुपारी मुंबईतील अंधेरी येथील राहत्या घरात त्याचा मृतदेह आढळला. त्याच्या मृत्यूमागचं नेमकं कारण अद्याप समोर आलेलं नाही. परंतु, ड्रग्जचे अतिसेवन केल्यामुळे मृत्यू झाल्याचा संशय व्यक्त केला जात आहे. आदित्यच्या मृत्यूने मनोरंजनविश्वावर शोककळा पसरली आहे.

आदित्य अंधेरीतील एका इमारतीत ११व्या मजल्यावर राहत होता. काही मित्रांना घरातील बाथरुममध्ये त्याचा मृतदेह आढळला. आदित्यच्या मित्रांनी वॉचमॅनच्या मदतीने त्याला लगेचच रुग्णालयात दाखल केलं होतं. परंतु, डॉक्टरांनी त्याला मृत घोषित केलं. त्याचा मृतदेह पोस्ट मॉर्टेमसाठी पाठविण्यात आला आहे. पुढील चौकशी सुरू असल्याचे मुंबई पोलिसांकडून सांगण्यात आले.

आदित्य सिंह राजपूतने वयाच्या 17 व्या वर्षी मनोरंजन क्षेत्रातील करिअरला सुरुवात केली होती. आदित्यच्या मृत्यूनं मनोरंजन विश्वाला धक्का बसला आहे. 'स्प्लिट्सविला' या शोमध्ये आदित्य सिंह राजपूतने काम केले होते. तसेच त्यानं काही जाहिरातींमध्ये देखील काम केले.