(Shilpa Shetty - Raj Kundra ) बॉलिवूड अभिनेत्री शिल्पा शेट्टी आणि तिचे पती राज कुंद्रा यांच्या अडचणीत वाढ झाली आहे. मुंबईतील एका व्यावसायिकाची तब्बल 60 कोटी रुपयांची फसवणूक केल्याच्या आरोपावरून आर्थिक गुन्हे शाखेने (EOW) या दोघांविरोधात गुन्हा दाखल केला आहे.
तक्रारदार दीपक कोठारी यांनी पोलिसांना दिलेल्या माहितीनुसार, 2015 मध्ये राजेश आर्या यांच्या माध्यमातून त्यांची शिल्पा शेट्टी आणि राज कुंद्रा यांच्याशी ओळख झाली. त्या काळात कुंद्रा आणि शेट्टी हे बेस्ट डील टीव्ही प्रायव्हेट लिमिटेड या होम शॉपिंग आणि ऑनलाइन विक्री करणाऱ्या कंपनीचे संचालक होते. या कंपनीने कोठारी यांच्याकडून 75 कोटी रुपये 12% व्याजदराने घेतल्याचे सांगितले. मात्र, व्याज टाळण्यासाठी त्यांनी ती रक्कम कंपनीत गुंतवणुकीच्या स्वरूपात दाखवल्याचा आरोप आहे.
कोठारी यांच्या म्हणण्यानुसार, ठरल्याप्रमाणे मासिक हप्त्यांद्वारे मूळ रक्कम परत करण्याचे आश्वासन देण्यात आले, पण ते पाळले गेले नाही. 2016 च्या सप्टेंबरमध्ये शिल्पा शेट्टीने संचालक पदाचा राजीनामा दिला. तरीही, 2015 ते 2023 दरम्यान "व्यवसाय वाढवून पैसे परत करू" अशी हमी देण्यात आली, परंतु ती पूर्ण झाली नाही. सध्या संबंधित कंपनी बंद झाली असून, गुन्हा जुहू पोलीस ठाण्यात नोंदवण्यात आला आहे. आर्थिक गुन्हे शाखा या प्रकरणाचा तपास करत असून, पुढील कारवाईची शक्यता व्यक्त केली जात आहे.