प्रत्येकाला क्रिकेटची आवड असते. क्रिकेट म्हटलं की सगळ्याचा उत्साह जागा होतो. मग आपले सिनेसृष्टीचे कलाकार कसे मागे राहतील. आपल्या मराठी सिनेसृष्टीतील अनेक कलाकार क्रिकेटचे शौकीन आहेत. पण शुटिंग, वेळेची कमतरता यामुळे त्यांना क्रिकेट खेळण्यासाठी वेळ मिळत नाही. हेच कारण लक्षात घेऊन अभिनेता सुशांत शेलार यांनी मराठी बॉक्स सेलिब्रिटी क्रिकेट लीगची (marathi box celebrity cricket league) (एमबीसीसीएल) स्थापना केली आहे. ‘शेलार मामा फाऊंडेशन’ आणि ‘प्लॅनेट मराठी’ प्रस्तुत एमबीसीसीएलच्या लोगोचे नुकतेच अनावरण करण्यात आले आहे.

लोगोचे अनावरण झाले असून एमबीसीसीएलमध्ये महाराष्ट्रातील कलाकारांचा खेळ आपल्याला पाहायला मिळणार आहे. या लोगोमध्ये महाराष्ट्राची शान दर्शवणाऱ्या पिळदार मिश्या, फेटा, बॅट, बॉल आणि स्टंप दिसत आहेत. ही एक खरी क्रिकेटची मॅच असून यात काही संघ असतील. तर या खेळामध्ये पुरुषासोबत महिला कलाकार देखील सहभागी होणार आहेत. लवकरच हे संघ जाहीर होणार असून महाराष्ट्रातील विविध प्रसिध्द शहराचे नाव प्रत्येक संघाला दिले जाणार आहे.