बॉलीवूड अभिनेता सलमान खानला (Salman Khan) गेल्या महिन्यात जीवे मारण्याच्या धमक्या आल्या होत्या. तेव्हापासून त्याची सुरक्षा वाढवण्यात आली आहे. त्याचबरोबर सलमान खान देखील प्रत्येक बाबतीत सावध दिसत आहे. काही दिवसांपूर्वी त्याने स्वत:साठी बंदूक परवान्यासाठी अर्ज केला होता. मीडिया रिपोर्ट्सनुसार, सलमान खानने आपली कार बुलेटप्रूफमध्ये अपग्रेड केली आहे.

सलमान खानने बंदूक परवान्यासाठी अर्ज केला होता

सलमान खानने गेल्या आठवड्यात मुंबईचे पोलीस आयुक्त विवेक फणसाळकर यांची दक्षिण मुंबईतील त्यांच्या कार्यालयात भेट घेतली होती. सलमान खानने पोलिस सहआयुक्त (कायदा व सुव्यवस्था) विश्वास नांगरे पाटील (Vishwas Nangare Patil) यांचीही भेट घेतली. त्याचा व्हिडिओ समोर आला आहे, ज्यामध्ये सलमान खान मुंबई पोलीस आयुक्त कार्यालयातून बाहेर पडताना दिसत आहे. मुंबई पोलिसांनी सांगितले होते की, धमकीचे पत्र मिळाल्यानंतर सलमान खानने नुकतेच मुंबई पोलिस आयुक्त कार्यालयात स्वसंरक्षणासाठी शस्त्र परवान्यासाठी अर्ज केला आहे.

विशेष म्हणजे 5 जून रोजी सलमान खान आणि त्याचे वडील सलीम खान यांना धमकीचे पत्र आले होते. वांद्रे येथील बँडस्टँड प्रोमेनेड येथील सलीम खान (Salim Khan) यांच्या गार्डला धमकीचे पत्र मिळाले होते. मीडिया रिपोर्ट्सनुसार, सलमान खान आणि सलीम खान यांना मिळालेल्या धमकीच्या पत्रात त्यांना सिद्धू मूसवालासारखे बनवले जाईल, असे लिहिले होते. धमकीचे पत्र मिळाल्याच्या काही दिवसांपूर्वी पंजाबी गायक सिद्धू मूसवाला यांची हत्या करण्यात आली होती.