भारतीय माहिती आणि प्रसारण मंत्रालयाने (I&B Ministry) भारतीय सिनेमा आणि कथाकथन परंपरेचा गौरव करणाऱ्या प्रजासत्ताक दिनाच्या टॅब्लोसाठी दोन दिग्गज सर्जनशील व्यक्तिमत्त्वांना एकत्र आणले आहे. दिग्दर्शक संजय लीला भन्साळी आणि गायिका श्रेया घोषाल.

आय अँड बी (I&B) मंत्रालयाच्या प्रजासत्ताक दिन परेडसाठीच्या टॅब्लोसाठी संजय लीला भन्साळी यांनी ‘भारत गाथा’ ही संकल्पना साकारली आहे. विशेष म्हणजे, भारताच्या सर्वात प्रतिष्ठित राष्ट्रीय समारंभात भारतीय सिनेमाचे प्रतिनिधित्व करणारे ते पहिलेच भारतीय चित्रपट दिग्दर्शक ठरणार आहेत. या संकल्पनेला साकार रूप देण्यासाठी भन्साळींनी श्रेया घोषाल यांना एका खास तयार केलेल्या गीतासाठी जोडले असून, हे गीत 26 जानेवारी रोजी कर्तव्य पथावरून टॅब्लो मार्गक्रमण करताना वाजवले जाणार आहे.

‘भारत गाथा’च्या भावनेतून साकारलेला I&B मंत्रालयाचा हा टॅब्लो भारताच्या अनंत आणि समृद्ध कथाकथन परंपरेचा उत्सव साजरा करतो. संगीत, दृश्ये, अभिनय आणि सिनेमा या सर्व माध्यमांमधून पिढ्यान्‌पिढ्या जपली गेलेली सांस्कृतिक अभिव्यक्ती या टॅब्लोमध्ये अधोरेखित केली जाणार आहे. आधुनिक काळातील प्रभावी कथाकथन माध्यम म्हणून भारतीय सिनेमा या व्यापक कथानकात महत्त्वाचे स्थान मिळवतो.

या घडामोडीशी संबंधित एका सूत्राने सांगितले, “संजय लीला भन्साळी यांनी संकल्पित केलेल्या ‘भारत गाथा’ या प्रजासत्ताक दिनाच्या टॅब्लोसाठी श्रेया घोषाल यांनी खास स्वरबद्ध केलेले गीत गायले आहे. भन्साळी यांच्या कथाकथनात संगीताला नेहमीच महत्त्वाचे स्थान असते, आणि जेव्हा भन्साळी व श्रेया एकत्र येतात, तेव्हा त्यातून एक वेगळीच भावनिक खोली निर्माण होते. त्यांच्या सहकार्यामुळे नेहमीच प्रेक्षकांच्या मनात घर करून राहणारे क्षण तयार झाले आहेत, आणि यावेळी ती संगीताची जादू थेट कर्तव्य पथावर, प्रजासत्ताक दिन परेडचा भाग बनणार आहे.”

हा उपक्रम I&B मंत्रालयाच्या त्या दृष्टीकोनाचे प्रतीक आहे, ज्यामध्ये भारतीय सिनेमाकडे केवळ मनोरंजन म्हणून नव्हे, तर भारताच्या सांस्कृतिक आणि नागरीकरणात्मक कथाकथन परंपरेचा अविभाज्य भाग म्हणून पाहिले जाते. जी परंपरा जागतिक स्तरावर देशाचे प्रतिनिधित्व करत राहते.

भन्साळींच्या सिनेमॅटिक दृष्टिकोनातून घडणारी कथा आणि श्रेया घोषाल यांच्या स्वरातून मिळणारी आत्मा यामुळे, ‘भारत गाथा’अंतर्गत साकारलेला I&B मंत्रालयाचा प्रजासत्ताक दिनाचा टॅब्लो भारतीय कथाकथनाला समर्पित एक भावपूर्ण आणि भव्य आदरांजली ठरणार आहे. जिथे इतिहास, संस्कृती आणि सिनेमा एकत्र येतात.