अभिनेत्री तुनिषा शर्माच्या अचानक आत्महत्येमुळे संपूर्ण टीव्ही इंडस्ट्रीत शोककळा पसरली आहे. अभिनेत्रीच्या निधनाबद्दल शोक व्यक्त करत छोट्या पडद्यावरील अनेक स्टार्सनी त्यांना श्रद्धांजली वाहिली आहे. दरम्यान, तुनिषाचा पोस्टमॉर्टम रिपोर्टही समोर आला आहे. अभिनेत्रीचे पोस्टमॉर्टम जेजे हॉस्पिटलमध्ये झाले, ज्याच्या रिपोर्टमध्ये अनेक प्रश्नांची उत्तरे मिळाली आहेत. अभिनेत्रीच्या मृत्यूनंतर ती प्रेग्नंट असल्याच्या अफवा पसरू लागल्या होत्या. मात्र, पोलिसांनी या अफवा तूर्तास फेटाळून लावल्या आहेत.

पोस्टमॉर्टम रिपोर्टनुसार, 20 वर्षीय अभिनेत्रीचा मृत्यू गुदमरल्यामुळे झाला. रिपोर्टनुसार, अभिनेत्रीच्या शरीरावर जखमेच्या कोणत्याही खुणा आढळल्या नाहीत. शनिवारी तुनिषाने अलिबाबा या टीव्ही शोच्या सेटवर आत्महत्या केली. तुनिषाने तिचा को-स्टार शीजान मोहम्मद खानच्या मेकअप रूममध्ये गळफास लावून घेतला. घटनेची माहिती मिळताच पोलिसांनी घटनास्थळी तपास सुरू केला. यानंतर रात्री उशिरा मृतदेह शवविच्छेदनासाठी जेजे रुग्णालयात पाठवण्यात आला. चार-पाच डॉक्टरांच्या उपस्थितीत अभिनेत्रीचे शवविच्छेदन करण्यात आले. यादरम्यान त्याची व्हिडिओग्राफीही करण्यात आली.

तुनिषाने आत्महत्या केल्यानंतर तिच्या आईने शीजानवर अनेक गंभीर आरोप केले आहेत. अभिनेत्रीच्या आईच्या म्हणण्यानुसार, शीजनच्या चिथावणीमुळेच तिच्या मुलीने असे पाऊल उचलले. तुनिषाच्या आईच्या तक्रारीवरून शीजनविरुद्ध कलम ३०६ अंतर्गत एफआयआर दाखल करण्यात आला आहे. रात्री उशिरा चौकशीनंतर पोलिसांनी त्याला अटक केली. सध्या हा अभिनेता चार दिवसांच्या पोलिस कोठडीत आहे.