शिवसेना आमदार अर्जुन खोतकर आणि मुलगा अभिमन्यू खोतकर यांना सोशल मीडियावरून जिवे मारण्याच्या धमक्या दिल्याप्रकरणी जालना पोलिसांनी मोठी कारवाई केली आहे. स्थानिक गुन्हे शाखा (LCB) आणि तालुका पोलिसांनी संयुक्त कारवाई करत नांदेड आणि पुणे येथून दोन संशयितांना ताब्यात घेतले आहे.
अटक केलेल्यांमध्ये सतीश पांडुरंग शिंदे (रा. हिमायतनगर, जि. नांदेड) आणि आंतेश्वर बाबू मुंडकर (रा. पुणे) यांचा समावेश आहे. पोलिस निरीक्षक सुरेश उनवणे यांनी याबाबत माहिती दिली असून, सध्या या प्रकरणाचा सखोल तपास सुरू आहे.
या प्रकरणाची पार्श्वभूमी :
जालना शहरातील एका अल्पवयीन मुलाने आमदार अर्जुन खोतकर आणि स्वर्गीय गजू तौर यांचा एकत्रित व्हिडिओ सोशल मीडियावर व्हायरल केला होता. त्या व्हिडिओवर खोतकर आणि अभिमन्यू खोतकर यांना थेट जिवे मारण्याच्या धमक्या देणाऱ्या कॉमेंट्स आल्याचे उघड झाले. पोलिसांनी त्या अल्पवयीन मुलालाही ताब्यात घेऊन चौकशी केली आहे.
यासोबतच, खोतकर आणि तौर यांचे जुने व्हिडिओही तपासण्यात येत आहेत आणि त्यावरील प्रतिक्रियांची पडताळणी केली जात आहे. या प्रकरणाचा तपास आयुष नोपानी, अपर पोलिस अधीक्षक, जालना यांच्या मार्गदर्शनाखाली सुरू आहे. पुढील तपासासाठी ताब्यात घेतलेल्या दोन्ही व्यक्तींना न्यायालयासमोर हजर करण्यात येणार असल्याची माहितीही पोलिसांनी दिली आहे.