थोडक्यात
सातारा जिल्ह्यातील फलटण उपजिल्हा रुग्णालयातील महिला डॉक्टरची आत्महत्या
PSI गोपाल बदनेच लास्ट लोकेशन पंढरपूर
पंढरपूरातूनही बदने पसार झाल्याची माहिती
(Satara Female Doctor case ) सातारा जिल्ह्यातील फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येच्या प्रकरणाने राज्यभरात खळबळ उडाली आहे. या घटनेत धक्कादायक बाब समोर आली असून, डॉक्टरने आत्महत्येपूर्वी आपल्या हातावरच मृत्यूस कारणीभूत असलेल्या दोन व्यक्तींची नावे लिहिली आहेत.
मृत डॉक्टरने आत्महत्येपूर्वी आपल्या हातावर सुसाईड नोट लिहिली होती, त्यात तिने धक्कादायक आरोप केले आहेत. त्या नोटमध्ये डॉक्टरने लिहिले आहे की, "PSI गोपाल बदने यांनी तिच्यावर पाच महिन्यांपासून वारंवार अत्याचार आणि लैंगिक शोषण केले, तसेच पोलीस अधिकारी प्रशांत बनकर यांनी तिला मानसिक छळ केला". त्या महिला डॉक्टरने या दोघांवर लैंगिक अत्याचार आणि मानसिक छळाचे गंभीर आरोप केले आहेत. फलटणमधील महिला डॉक्टर आत्महत्या प्रकरणात फरार आरोपींच्या शोधात पोलिसांची पाच पथकं रवाना करण्यात आल्याची माहिती मिळत आहे.
याच पार्श्वभूमीवर आता मुख्य आरोपी PSI गोपाल बदने अद्याप फरार असून त्याचे लास्ट लोकेशन समोर आले आहे. आरोपी गोपाल बदनेचं शेवटचं लोकेशन पंढरपूर असल्याची माहिती मिळत असून पंढरपूरमधून देखील तो आता पसार झाला असल्याची माहिती मिळत आहे. पंढरपूर आणि बीड भागात बदनेचा पोलिसांकडून शोध सुरू करण्यात आला आहे. गोपाल बदने हा मूळचा बीड जिल्ह्यातील परळीचा रहिवाशी असून 4 पथकांमार्फत PSI गोपाल बदनेचा शोध सुरू आहे.