मुलगा होण्यासाठी पत्नीवर सातत्याने अत्याचार केल्याची धक्कादायक घटना नांदेडमध्ये समोर आली आहे. या असह्य छळाला कंटाळलेल्या गर्भवती विवाहितेने अखेर गळफास घेऊन जीवन संपवल्याने परिसरात खळबळ उडाली आहे. पीडितेच्या वडिलांनी केलेल्या तक्रारीवरून पतीसह तीन नणंदांवर गुन्हा दाखल झाला असून पोलिसांनी तपास सुरू केला आहे.
हिंगोली जिल्ह्यातील प्रतीक्षा भोसले यांचा विवाह 2023 मध्ये नांदेड येथील लक्ष्मण भोसले यांच्याशी झाला होता. लग्नानंतर काही काळ सर्व काही सुरळीत असलं तरी मार्च 2024 मध्ये प्रतिक्षाने एका मुलीला जन्म दिल्यानंतर तिच्या जीवनात काळोख दाटला. सासरच्या मंडळींना मुलगी नकोn होती; ‘वंशाची दिवटी’ म्हणून मुलाचीच अपेक्षा ठेवत ते प्रतिक्षावर दबाव टाकू लागले.
मुलगा हवा म्हणून सतत त्रास
पुन्हा गर्भवती राहावी आणि यावेळी मुलगाच व्हावा यासाठी प्रतिक्षाला विविध प्रकारे मानसिक आणि शारीरिक छळ सहन करावा लागत होता. इतकेच नव्हे तर माहेरहून शाळेच्या व्हॅनसाठी पाच लाख रुपये आणण्याची मागणीही तिच्यावर केली जात होती. या सर्व तणावामुळे प्रतिक्षाचा एकदा गर्भपातही झाला. तरीही अत्याचार थांबला नाही.
तिसऱ्यांदा गर्भवती झाल्यानंतर तिला एका ‘विशेष डॉक्टरकडे’ नेण्यात आले. मुलगा होण्यासाठी काही औषधे घेण्यास सांगण्यात आले; मात्र प्रतिक्षाने ही औषधे घेण्यास नकार दिल्यावर नवऱ्याने तिच्यावर मारहाण केली. त्याचबरोबर तीनही नणंदा सतत फोनवरून शिवीगाळ, धमक्या आणि मानसिक छळ करत असल्याचं तक्रारीत नमूद आहे.
छळाला कंटाळून आत्महत्येचा मार्ग
सासरच्या सततच्या त्रासाने त्रस्त झालेल्या प्रतिक्षाने अखेरीस स्वतःचा जीव घेण्याचा निर्णय घेतला. घरी कोणी नसताना तिनं गळफास घेऊन आयुष्य संपवलं. अचानक घडलेल्या या प्रकारानं प्रतिक्षाच्या माहेरच्यांना मोठा धक्का बसला.
घटनेची माहिती मिळताच प्रतिक्षाच्या वडिलांनी विमानतळ पोलिस ठाण्यात तक्रार दाखल केली. त्यांच्या विधानावरून पती लक्ष्मण भोसले आणि तीन नणंदांवर बाललैंगिकता प्रतिबंधक कायदा, छळ, अत्याचार आणि आत्महत्येस प्रवृत्त केल्याच्या आरोपाखाली गुन्हा दाखल करण्यात आला आहे.
प्रकरणाने राज्यात संतापाची लाट
गर्भवती महिलेला मुलगा हवा म्हणून केलेला अमानुष छळ आणि अखेर तिच्या आत्महत्येने संपूर्ण नांदेड जिल्ह्यात संताप पसरला आहे. अशा घटनांमुळे महिला सुरक्षेचे प्रश्न पुन्हा ऐरणीवर आले असून ‘वंशाचा दिवा’ या विकृत मानसिकतेवर समाजात मोठी चर्चा सुरू आहे. पोलिसांनी या प्रकरणातील सर्व आरोपींवर कठोर कारवाई करण्याचे संकेत दिले आहेत.