थोडक्यात बातमी वाचण्यासाठी खाली स्क्रोल करा...

मुलुंड पूर्व येथील सौ. लक्ष्मीबाई इंग्लिश मीडियम स्कूल या शाळेत येत्या शिवजयंतीच्या पार्श्वभूमीवर विद्यार्थ्यांनी बनवलेल्या गडकिल्ल्यांचे भव्य आणि प्रेरणादायी प्रदर्शन आयोजित करण्यात आले. या उपक्रमात इयत्ता सातवीतील जवळपास १५० विद्यार्थ्यांनी उत्स्फूर्तपणे सहभाग नोंदवला. विशेष म्हणजे या सर्व विद्यार्थ्यांनी “टाकाऊपासून टिकाऊ” हे पर्यावरणपूरक धोरण स्वीकारून विविध साहित्यांचा कल्पकतेने वापर केला.

विद्यार्थ्यांनी महाराष्ट्रातील ऐतिहासिक गडकिल्ल्यांच्या सुंदर व आकर्षक प्रतिकृती साकारल्या. यामध्ये प्रतापगड, राजगड, सिंधुदुर्ग, रायगड, तसेच मुरूड जंजिरा या जलदुर्गांचाही समावेश होता. किल्ल्यांची रचना, तटबंदी, बुरुज, दरवाजे आणि परिसर यांचा बारकाईने अभ्यास करून विद्यार्थ्यांनी इतिहासाला जिवंत रूप दिले.

या प्रदर्शनामुळे विद्यार्थ्यांना छत्रपती शिवाजी महाराज यांच्या पराक्रमाची, दूरदृष्टीची आणि आपल्या समृद्ध ऐतिहासिक वारशाची सखोल माहिती मिळाली. इतिहास विषयातील शिक्षक बिजल पटेल व प्रिशा मोरया यांनी या उपक्रमासाठी विशेष मेहनत घेतली. विद्यार्थ्यांना केवळ अभ्यासक्रमापुरते न ठेवता प्रत्यक्ष अनुभवातून इतिहास समजावा, हा या उपक्रमाचा मुख्य उद्देश होता.

या प्रदर्शनाला शाळेचे संचालक प्रसाद कुलकर्णी, विश्वस्त पूजा कुलकर्णी, विश्वस्त अभिषेक कुलकर्णी तसेच माध्यमिक विभागाच्या मुख्याध्यापिका प्रज्ञा राजोपाध्ये यांचे अमूल्य मार्गदर्शन लाभले. पालकांनीही विद्यार्थ्यांना आवश्यक ते सहकार्य केले. एकूणच हा उपक्रम शैक्षणिक, सांस्कृतिक आणि पर्यावरणपूरक मूल्यांची जाणीव करून देणारा ठरला.