पुणे शहरात गेल्या २४ तासांत किमान तापमानात मोठी वाढ नोंदवली गेली असून, शीतलता ओसरत थंडी पुर्णपणे मिटली आहे. भारतीय हवामानशास्त्र विभागाच्या (आयएमडी) नोंदीनुसार, बुधवारी शहरात किमान तापमान १७.१ अंश सेल्सिअस आणि कमाल तापमान ३२.७ अंश सेल्सिअस इतके होते. आकाश मुख्यतः निरभ्र राहिले असले तरी सकाळी विरळ धुके आणि संध्याकाळी ढगाळ वातावरण दिसून आले, ज्यामुळे दुपारी उकाड्याचा त्रास सोसावा लागला.
हवामान विभागाने पुढील तीन ते चार दिवस हवामानात फारसा बदल नसल्याचा अंदाज वर्तवला आहे. गुरुवारी (१९ फेब्रुवारी) किमान तापमान १६ अंश सेल्सिअसपर्यंत खाली येऊ शकते, तर कमाल तापमान ३३ अंशांपर्यंत पोहोचेल. शुक्रवारीपासून (२० फेब्रुवारी) दोन्ही तापमानात किंचित वाढ होईल, ज्यात कमाल ३५ अंश आणि किमान १८ अंश सेल्सिअस नोंदवले जाण्याची शक्यता आहे. आकाश निरभ्र राहून सकाळी विरळ धुके पडण्याची शक्यता आहे, ज्यामुळे पुणेकरांना उन्हाळ्याची चाहूल लागेल.
आयएमडी पुणे विभागाचे वैज्ञानिक डॉ. एस. डी. सानप यांनी सांगितले की, दक्षिणेकडून येणाऱ्या आर्द्र वाऱ्यांमुळे रात्री ढगाळ वातावरण निर्माण झाले असून, जमीनीची उष्णता हवेत अडकली आहे. यामुळे किमान तापमानात सरासरीपेक्षा २ अंशांनी वाढ झाली आहे. गेल्या काही दिवसांत वेस्टर्न डिस्टर्बन्सच्या प्रभावामुळे मंगळवारी अचानक गारवा जाणवला होता, जो आता ओसरत आहे. पाकिस्तान आणि उत्तर-पश्चिम भारतात पावसाची शक्यता असली तरी पुण्यात कोरडे हवामान कायम राहील.
या चढउतारामुळे आरोग्यतज्ज्ञांनी नागरिकांना पुरेसे पाणी पिण्याचे, हलका आहार घेण्याचे आणि सकाळ-संध्याकाळी बाहेर पडण्याचे सांगितले आहे. फेब्रुवारीतच उन्हाळ्याची चाहूल लागल्याने शेतकरी आणि शहरी रहिवाशांमध्ये अस्वस्थता वाढली आहे.