राज्यात ओमायक्रॉन बाधितांच्या संख्येत दिवसेंदिवस वाढ होताना दिसत आहे. आज दिवसभरात राज्यात ११ नवीन 'ओमायक्रॉन'बाधित आढळले. यामुळे राज्यातील आतापर्यंतची एकूण बाधितांची संख्या ६५ वर पोहचली आहे. तर ८२५ नवीन कोरोनाबाधित आढळले आहेत.

११ 'ओमायक्रॉन'बाधितांमध्ये ८ जण हे मुंबई विमानतळावरील स्क्रीनिंग दरम्यान आढळले. तर, पिंपरी-चिंचवड, उस्मानाबाद आणि नवी मुंबई येथे प्रत्येकी एक रूग्ण आढळून आला. आजपर्यंत आढळून आलेल्या ६५ 'ओमायक्रॉन'बाधितांपैकी ३४ जणांची आरटीपीसआर टेस्ट निगेटिव्ह आल्याने त्यांना रुग्णालयातून डिस्चार्ज देण्यात आलेला आहे.

राज्यात ८२५ नवीन कोरोनाबाधितांची नोंद झाली. तर, ७९२ रूग्ण कोरोनामुक्त झाले असून, १४ कोरोनाबाधित रूग्णांचा मृत्यू देखील झाला आहे. राज्याचा मृत्यू दर २.१२ टक्के आहे. तर, आजपर्यंत राज्यात ६४,९८,८०७ रूग्ण कोरोनामुक्त झालेले असून, राज्यातील रूग्ण बरे होण्याचे प्रमाण (रिकव्हरी रेट) ९७.७१ टक्के आहे.सद्यस्थितीस राज्यात ७३,०५३ जण गृह विलगिकरणात असून, ८६४ जण संस्थात्मक विलगिकरणात आहेत.