रत्नागिरी : राज्याचे माजी परिवहन मंत्री व शिवसेना नेते अनिल परब (Anil Parab) यांच्या अडचणीत वाढ होताना दिसत आहे. केंद्राकडून नेमलेली समिती परबांच्या मुरुडमधील साई रिसाॅर्टवर दाखल झाली आहे. केंद्रीय पर्यावरण खात्याकडून (Environmental Department) टीम साई रिसॉर्टवर चौकशी सुरु आहे.
अनिल परब यांच्या साई रिसॉर्टवर केंद्राकडून नेमलेली पर्यावरण खात्याची पाच जणांची टीम दाखल झाली आहे. टीममध्ये चेन्नईमधील पर्यावरण संस्था आणि महाराष्ट्र कोस्टल झोन मॅनेजमेंटचे अधिकारी यांचा समावेश आहे. अनिल परब यांच्या मुरुडमधील साई रिसॉर्टनं सीआरझेडचे उल्लंघन केल्याचा आरोप भाजप नेते किरिट सोमय्या यांनी केला होता. यानुसार केंद्रीय टीमकडून पर्यावरणाकडून हानीची चौकशी करण्यात येत आहे.
तर, टीम साई रिसॉर्टप्रमाणेच सी कोच रिसॉर्टची देखील चौकशी करण्यात येणार असल्याची माहिती सुत्रांनी दिली आहे. यामुळे अनिल परब यांच्या अडचणीत चांगलीच वाढ झाली आहे.
दरम्यान, अनिल परब यांच्या मालमत्तांवर ईडीने छापे टाकले होते. 13 तासांच्या चौकशीनंतर ईडीचं पथक त्यांच्या घरातून बाहेर पडलं. यावेळी त्यांनी दापोलीतील साई रिसॉर्टचे मालक हे सदानंद कदम आहेत. कोर्टात त्यांनी त्याबद्दलची माहिती दिली आहे. तसंच हे रिसॉर्ट सुरु झालेलं नाही. मात्र असं असतानाही पर्यावरणाची दोन कलमं लावून सांडपाणी समुद्रात जातं असं सांगून तक्रार करण्यात आली. मात्र हे रिसॉर्ट सुरु नाही असं अनिल परब यांनी सांगितलं. ईडीने विचारलेल्या प्रश्नांची उत्तर मी दिले आणि यापूर्वी देखील उत्तर दिली असून, यापुढेही उत्तर देण्याची माझी तयारी आहे, असे अनिल परबांनी सांगितले आहे.