मराठवाड्यात झालेल्या अतिवृष्टीवर मुख्यमंत्री उद्धव ठाकरे यांनी सरकार शेतकऱ्यांच्या पाठीशी असून सर्वतोपरी मदत त्यांना करण्याचे निर्देश प्रशासनाला दिले होते. मुख्यमंत्र्यांच्या या आश्वासनावर भाजप नेते अतूल भातखळकर यांनी टीका केली आहे.
."कोणत्याही परिस्थितीत बाधित शेतकरी, नागरिक यांना प्रशासनाने तातडीची सर्वतोपरी मदत पोहचवावी", असे निर्देश मुख्यमंत्र्यांनी प्रशासनाला दिले आहेत. "सध्या बचाव व तातडीच्या मदत कार्यास वेग द्यावा व महसूल विभाग, कृषी विभागाने झालेल्या नुकसानीचे पंचनामे तातडीने सुरु करावेत", असेही निर्देश मुख्यमंत्र्यांनी दिले.
या मुख्यमंत्र्यांच्या विधानाचा अतूल भातखळकर यांनी समाचार घेत ट्विट केले आहे. कोकणाला दिलेली आश्वासने अजून हवेतच असल्याची खरमरीत टीका करत आता मराठवाड्यातील नागरीकांसाठी या नव्या वाफा असल्याचा हल्लाबोल भातखळकर यांनी केला.