महाराष्ट्रातील २९ महापालिका निवडणुकीचा निकाल १६ जानेवारीला जाहीर होणार असून, मुंबई महानगरपालिका केंद्रस्थानी आहे. ११ जानेवारीला शिवतीर्थवर उद्धव ठाकरे आणि राज ठाकरे यांच्या संयुक्त सभेला प्रत्युत्तर म्हणून मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी आजच शिवतीर्थवर महायुतीची सभा घेतली. फडणवीसांनी ठाकरे बंधूंच्या युतीची खिल्ली उडवत "लाव रे तो व्हिडीओ" म्हणत राज ठाकरेंच्या शैलीत त्यांच्यावर हल्लाबोल केला.
फडणवीस म्हणाले, "महापालिकेवर महायुतीचा भगवा फडकवण्यासाठी पुन्हा एकत्र आलो आहोत. आज स्वामी विवेकानंद जयंती आहे, त्यांनी हिंदू संस्कृती आणि भगवा झेंडा जगासमोर नेला. इतक्या सभा घेण्याची गरज नाही, पण माझ्यासाठी हा संवाद आहे. काही गोष्टी वेगळ्या संवादात बोलावे लागतात." यानंतर त्यांनी ठाकरे बंधूंच्या एकमेकांवर केलेल्या टीकेचे व्हिडीओ दाखवले. राज ठाकरे उद्धव ठाकरेंवर सडकून टीका करताना आणि उद्धव राज ठाकरेंवर हल्लाबोल करताना दिसले. "सत्तेसाठी बनवाबनवी चालू आहे," असे फडणवीस म्हणाले.
पुढे बोलताना फडणवीस यांनी स्पष्ट केले, "काहीही झाले तरी मुंबईचा महापौर मराठीच होईल. कोणाचा बाप आला तरी मुंबईला महाराष्ट्रापासून वेगळे करता येणार नाही." या सभेने राजकीय वातावरण ढवळून निघाले असून, १५ जानेवारीला होणाऱ्या मतदानानंतर निकालाची उत्सुकता वाढली आहे. महायुती आणि महाविकास आघाडीमध्ये मुंबईवरून स्पर्धा तीव्र आहे.