कर्नाटकमधील बंगळुरूमध्ये छत्रपती शिवाजी महाराज यांच्या पुतळ्याची विटंबना झाल्याची घटना घडली होती. या घटनेनंतर शिवप्रेमी आक्रमक झाले असून राजकीय वातावरणही तापले आहे. महाविकास आघाडीतल्या नेत्यांनी या घटनेचा निषेध केला आहे, कर्नाटकमध्ये भाजप सरकारचे असल्याने महाराष्ट्रातील भाजप नेत्यांनी या घटनेवर चुपी साधल्याचा आरोप होता. तर आता या प्रकरणावर विरोधी पक्षनेते देवेंद्र फडणवीस यांचे ट्वीट समोर आले आहे.
'आमचे आदर्श छत्रपती शिवाजी महाराज हे केवळ महाराष्ट्र नाही,तर संपूर्ण देशाचे दैवत आहेत. राज्यांच्या आणि पक्षांच्या सीमा आमच्या या आदर्शाच्या सन्मानाआड कधीही येणार नाहीत.त्यामुळे देशाच्या कुठल्याही भागात शिवछत्रपतींचा अवमान होत असेल तर या विकृतीचा निषेधच! ज्यांनी संपूर्ण राष्ट्र एकसंध केले, अशा छत्रपती शिवाजी महाराजांचा अवमान सहन केला जाणार नाही, हे कर्नाटकचे मुख्यमंत्री बसवराज बोम्मई जी यांनीही स्पष्ट केले आहे. या प्रकरणातील काही आरोपींना सुद्धा अटक झाली आहे. आणखीही सत्य बाहेर येईलच!' असं ट्वीट फडणवीस यांनी केलं आहे.