थोडक्यात

• दिल्लीमधील स्फोटाच्या घटनेनंतर अमरावतीमध्ये हायअलर्ट

• प्रत्येक रस्त्यावर आणि चौकात अमरावती शहर पोलिसांकडून नाकाबंदी

• राज्यात मोठ्या शहरांमध्ये वाहनांची तपासणी केली

(Amravati) नवी दिल्लीमध्ये लाल किल्ला मेट्रो स्टेशन गेट क्रमांक 1 जवळ पार्किंगमध्ये स्फोट झाला. या स्फोटानंतर अनेक गाड्यांना आग लागली. हा स्फोट एवढा मोठा होता की, आजूबाजूच्या दुकानांच्या काचाही फुटल्या. या स्फोटात सुमारे 8 जणांचा मृत्यू झाला असून, 20 हून अधिक लोक जखमी झाले.

जखमींना रुग्णालयात उपचारासाठी दाखल करण्यात आले. लाल किल्ला परिसरात मेट्रोच्या गेट क्रमांक एकवर एक कार उभी होती. याच कारमध्ये हा स्फोट झालेला आहे. या स्फोटामुळे आजूबाजूच्या तीन गाड्यांना आग लागल्याची घटना घडली. हा स्फोट नेमका कसा झाला? याचा तपास आता घेतला जात आहे. याच पार्श्वभूमीवर आता ठिकठिकाणी सुरक्षा वाढवण्यात आली आहे.

याच पार्श्वभूमीवर आता अमरावतीमध्ये देखील हायअलर्ट देण्यात आला आहे. अमरावती शहरात येणाऱ्या प्रत्येक रस्त्यावर आणि चौकात अमरावती शहर पोलिसांकडून नाकाबंदी करत वाहनांची तपासणी करण्यात येत आहे. दिल्लीमधील घटनेनंतर राज्यात मोठ्या शहरांमध्ये वाहनांची तपासणी केली जात आहे. त्या पार्श्वभूमीवर अमरावतीत देखील वाहनांची तपासणी आणि वाहन चालकांची चौकशी केली जात आहे. कोणी संशयित आढळल्यास त्यांची कसून चौकशी पोलीस करत आहेत. रात्री उशिरापर्यंत ही नाकीबंदी सुरू असल्याची माहिती मिळत आहे.