थोडक्यात

• कालिदास कोळंबकर भूषवणार विधानसभेचं अध्यक्षपद

• पुढील 3 दिवस कोळंबकर यांच्याकडे अध्यक्षपदाची जबाबदारी

• कालिदास कोळंबकर पहिल्या 2 दिवसांत नव्या आमदारांना देणार शपथ

महायुतीचा शपथविधी सोहळा काल पार पडला. मुंबईतील आझाद मैदानावर भव्य शपथविधी सोहळा पार पडला. महायुतीचा शपथविधी सोहळ्यात देवेंद्र फडणवीस यांनी मुख्यमंत्रीपदाची, एकनाथ शिंदे आणि अजित पवार यांनी उपमुख्यमंत्रीपदाची शपथ घेतली. उद्या सकाळी 11 वाजता विधानसभेचे विशेष अधिवेशन पार पडणार आहे. राज्यातील 288 आमदारांना विधानसभेकडून अधिवेशनाचे निमंत्रण देण्यात आले आहे.

विधीमंडळात पुढील दोन दिवसांत नवनिर्वाचित आमदारांचा शपथविधी होणार असून 7 व 8 तारखेला आमदारांचा शपथविधी पूर्ण होणार असून 9 डिसेंबरला नव्या विधानसभा अध्यक्षांची निवड होणार आहे. राज्यपालांच्या दोन्ही सभागृहातील अभिभाषणाने अधिवेशनाची सांगता होणार आहे.

याच पार्श्वभूमीवर आज भाजपचे आमदार कालिदास कोळंबकर आज हंगामी अध्यक्ष म्हणून राजभावनात जाऊन शपथ घेणार आहे. आज राजभवनामध्ये राज्याचे राज्यपाल सी.पी. राधाकृष्णन हंगामी विधानसभा अध्यक्ष यांना शपथ देणार आहेत.

विशेष अधिवेशनात नवनिर्वाचित आमदारांचा शपथविधी पार पडणार आहे. पुढील 3 दिवस कोळंबकर यांच्याकडे अध्यक्षपदाची जबाबदारी राहणार असून कोळंबकर पहिल्या 2 दिवसांत नव्या आमदारांना शपथ देणार आहेत. 9 डिसेंबरला विधानसभेच्या नव्या अध्यक्षांची निवड होणार आहे.