भूपेश बारंगे | वर्धा : जिल्ह्याच्या पुलगाव शहरात शाळेत जात असतानाच नराधम दोघांनी चिमुकलीला चाकूचा धाक दाखवून अपहरण केले व कारमध्ये बसवून धावत्या गाडीत लैंगिक अत्याचार केल्याची धक्कादायक घटना घडली आहे. या घटनेने एकच खळबळ उडाली असून समाजमन सुन्न झाले आहे. याप्रकरणी पुलगाव पोलिसांनी दोघांविरुद्ध विविध कलमान्वये गुन्हा दाखल केला आहे.

माहितीनुसार, 13 वर्षीय पीडिता ही दररोजप्रमाणे घरुन शाळेत जाण्यासाठी निघाली. शाळेत जात असतानाच तिला सुमेध मेश्राम नामक युवक आणि एका अनोळखी युवकाने आवाज दिला. पीडिता ही शाळेसमोरील प्रवेशद्वाराजवळ थांबली असता आरोपी नराधम सुमेध याने चाकूचा धाक दाखवून तिला जबरदस्ती कारमध्ये वाहनात जबरदस्ती खेचत नेत बसवले. आणि अनोळखी युवकाने कार समोर नेली. पीडिता ही आरडाओरड करीत होती. पण, कारच्या काचा बंद होत्या. सुमेधने पीडितेवर धावत्या कारमध्येच बळजबरी अत्याचार केला. तसेच ही बाब कोणाला सांगितल्यास जीवे मारण्याची धमकी दिली.

पीडितेने सर्व आपबिती तिच्या घरच्यांना सांगितली असता आईने थेट पुलगाव पोलीस ठाणे गाठले. पीडितेच्या आईने सुमेध आणि त्याच्या एका मित्राविरुद्ध तक्रार दिली. तक्रारीवरुन पोलिसांनी दोन्ही आरोपींविरुद्ध विविध कलमान्वये गुन्हा केला आहे. व प्रकरणाची गंभीरता लक्षात घेत पोलिसांनी तात्काळ आरोपींच्या शोधार्थ पथक रवाना केले आहे. दोन्ही नराधम आरोपी पोलिसांच्या रडारवर असून लवकरच दोघांनाही अटक करण्यात येणार असल्याची माहिती देण्यात आली आहे.