अनिल देशमुखांवर सीबीआयकडून आणखी एक गुन्हा दाखल करण्यात आला आहे. याची माहिती स्वत: अनिल देशमुखांनी ट्विटरवरुन दिली आहे. अनिल देशमुख ट्विट करत म्हणाले की, धन्यवाद... देवेंद्रजी फडणवीस माझ्यावर #CBI कडून आणखी एक तथ्यहीन गुन्हा दाखल केला गेला आहे.
जनतेचा कौल बघून फडणवीसांच्या पायाखालची वाळू घसरल्याने हे कटकारस्थान सुरू झाले आहे. या अशा धमक्यांना आणि दबावाला मी अजिबात भीक घालत नाही. न झुकता - न डगमगता मी #BJP च्या या दडपशाही विरुद्ध लढण्याची खूनगाठ बांधली आहे.
यासोबतच ते पुढे म्हणाले की, महाराष्ट्रात फडणवीसांकडून किती खालच्या पातळीचे आणि विकृत मानसिकतेचे घाणेरडे राजकारण सुरू आहे ते जनतेने बघावे. लोकसभा निवडणुकीत या कारस्थानी नेतृत्वाला जनतेने जागा दाखवून दिली आहे, आता महाराष्ट्राची जनता विधानसभा निवडणुकीची वाट बघत आहे ! असे अनिल देशमुख म्हणाले.