20 ऑगस्ट रोजी काँग्रेसचे नेते राजीव गांधी यांच्या जयंतीनिमित्त बीकेसी मैदान मुंबई येथे काँग्रेस पक्षाकडून भव्य अशी जाहीर सभा घेण्यात येणार आहे. याच दिवशी विधानसभा निवडणुकीच्या प्रचाराचा नारळ फुटणार आहे .
काँग्रेसचे अध्यक्ष मल्लिकार्जुन खरगे, लोकसभेच्या विरोधी पक्षनेते राहुल गांधी, सरचिटणीस वेणूगोपाल, प्रभारी रमेश चेन्नीथला हे उपस्थित राहणार आहेत. यावेळी राज्यातील महाविकास आघाडीतील प्रमुख घटक पक्षाचे नेते शरद पवार आणि उद्धव ठाकरे हे सुद्धा मंचावर उपस्थित असतील.
आगामी विधानसभा निवडणुका डोळ्यासमोर ठेवून मुंबईत काँग्रेस पक्षाकडून शक्ती प्रदर्शन केले जाणार आहे. यासाठी राज्यातील काँग्रेस पक्षाच्या सर्व खासदार आणि आमदारांना पत्र लिहून मोठ्या संख्येने कार्यकर्ते आणि पदाधिकारी उपस्थित राहण्याचे आदेश दिलेले आहेत.