कोल्हापूर : उध्दव ठाकरे, संजय राऊतांनी मनोहर जोशींचं घर जाळायला लावलं, असा मोठा गौप्यस्फोट शिंदे गटाचे आमदार सदा सरवणकर यांनी केला आहे. उध्दव ठाकरेंच्या सांगण्यावरून जोशींच्या घरावर हल्ला केला, असेही त्यांनी म्हंटले आहे. सदा सरवणकर यांच्या विधानामुळे राजकीय वर्तुळात एकच खळबळ उडाली आहे. तर, सदा सरवणकर यांनी संजय राऊतांबद्दलही मोठा दावा केला आहे.
काय म्हणाले सदा सरवणकर?
आमदारकीच्या उमेदवारीसाठी उद्धव ठाकरे आणि संजय राऊत यांनी मनोहर जोशी यांचे घर जाळायला लावले, असा गौप्यस्फोट सदा सरवणकर यांनी केला. मला मनोहर जोशींनीच मातोश्रीवर उमेदवारी मागायला ताकद दाखवण्यास सांगितले होते. मात्र, मनोहर जोशी यांनीच उमेदवारी कापली, असे सांगत त्यांच्या घरावर हल्ला करायला सांगितले, असा उद्धव ठाकरे यांचा निरोप मला मिलिंद नार्वेकर यांनी दिला.
तर, संजय राऊत यांनी जाताना पेट्रोल पंप लागतो. तिथून पेट्रोल घेऊन घर पूर्ण जाळून टाका. काही शिल्लक ठेऊ नका, असा फोन केला होता. त्यामुळे मनोहर जोशींच्या घरावर हल्ला केल्याची जाहीर कबुली सदा सरवणकर यांनी कोल्हापुरात दिली. जाळ्यात अडकवून उमेदवारी नाकारायचे काम उद्धव ठाकरे करत असल्याचा आरोपही त्यांनी केला. एवढंच नाही तर राज आणि उद्धव एकत्र आले तर महाराष्ट्राचे भले होईल असे वक्तव्य मनोहर जोशी यांनी केल्याने त्यांना दसरा मेळाव्यात येऊ दिले नसल्याचा आरोपही त्यांनी केला आहे.