सिद्धेश म्हात्रे
नवी मुंबई महापालिकेने आपल्या क्षेत्रातील 100 टक्के नागरिकांचे कोरोना लसीकरणाचा पहिला डोस पूर्ण केलाय.100 टक्के लसीकरण करणारी नवी मुंबई महापालिका एमएमआर क्षेत्रातील पहिली महापालिका, तर राज्यातील दुसरी महापालिका ठरली आहे.

18 वर्षांवरील 11 लाख 7 हजार 233 नागरिकांना कोव्हीड लसीचा पहिला डोस देण्यात आला आहे. दुसरा डोस ही 52 टक्के नागरिकांना देऊन झालाय. ज्या व्यक्तींचा विविध सेवा पुरवताना मोठ्या प्रमाणावर जनसंपर्क येतो असे मेडिकल स्टोअर, हॉटेल, ब्युटी पार्लर, पेट्रोल पम्प, टोल नाका तसेच घरोघरी गॅस वितरण करणारे कर्मचारी, घरकाम करणारे महिला व पुरूष कामगार, ऑटो / टॅक्सी वाहनचालक, सोसायटी वॉचमन अशा कोरोनाच्या दृष्टीने जोखमीच्या व्यक्तींकरिता विशेष लसीकरण सत्राचे आयोजन करण्यात आले होते. बेघर, निराधार व्यक्ती, तृतीयपंथीय यांचेकरिता तसेच कॉरी क्षेत्र आणि रेडलाईट भागातही विशेष लसीकरण मोहीमा राबविण्यात आल्या.अंथरूणाला खिळलेल्या बेडरिडन व्यक्तींसाठी घरी जाऊन लसीकरण करण्यात आल्याने नवी मुंबई महापालिकेला 100 टक्के लसीकरणाचा टप्पा पार केला.

"एमएमआर भागातली नवी मुंबई महानगर पालिका आहे जिथे पहिला डोस 100 टक्के नागरीकांनी घेतला आहे. पालिकेचं धोरण असं होतं की फक्त स्वत:हुन लस घ्यायला येणारे नाही तर पोटेंशीयल सुपरस्प्रेडर लोकांना ओळखुन त्यांचेही लसीकरण तातडीने केलं. जरी लसीकरण चालु राहणार असलं तरी तिसऱ्या लाटेची शक्यता आहे. पण जेवढे जास्त नागरीक लस घेलील तेवढी तिसऱ्या लाटेची तीव्रता कमी होईल." असं महापालिका आयुक्त अभिजित बांगर यांनी सांगितलंय.