Atharva Sudame :सोशल मीडियावर ओळख निर्माण केलेला अथर्व सुदामे सध्या एका वादामुळे चर्चेत आहे. काही दिवसांपूर्वी PMPML बसमध्ये शूट केलेल्या व्हिडिओमुळे त्याच्यावर कारवाई झाली असून आता त्याला थेट 50 हजार रुपयांचा दंड ठोठावण्यात आला आहे.

अथर्वने बसमध्ये विनोदी आशयाची रील तयार केली होती. प्रवासी आणि कंडक्टरमधील हलक्या-फुलक्या संवादावर आधारित हा व्हिडिओ व्हायरल झाला होता. मात्र परवानगी न घेता सार्वजनिक वाहतुकीत शूटिंग केल्याने PMPML ने त्याची दखल घेतली.

या निर्णयामुळे सोशल मीडियावर संमिश्र प्रतिक्रिया उमटत आहेत. काही जण PMPML च्या भूमिकेला योग्य ठरवत आहेत, तर अनेक चाहते ही कारवाई अन्यायकारक असल्याचं म्हणत संताप व्यक्त करत आहेत. “इतर जणही बसमध्ये रील करतात, मग कारवाई फक्त अथर्ववरच का?” असा सवाल नेटकऱ्यांनी उपस्थित केला आहे. दरम्यान, दंड न भरल्यास कायदेशीर कारवाई केली जाईल, असा इशारा PMPML कडून देण्यात आला आहे. त्यामुळे हे प्रकरण आणखी चिघळण्याची शक्यता आहे.