वैभववाडी येथील पोलिस ठाण्यात कार्यरत असलेले पोलीस कॉन्स्टेबल अनिल गोविंद शेटे (वय ४०, मूळ गाव कोडोली, ता. पन्हाळा, जि. कोल्हापूर) यांनी आपल्या राहत्या घरी आत्महत्या केली. गुरुवारी (ता. १ मे) रात्री ८.३० वाजण्याच्या सुमारास हा धक्कादायक प्रकार घडला.
कॉन्स्टेबलने अनिल शेटे यांची काही काळासाठी विजयदुर्ग पोलिस स्थानकात बदली झाली होती. त्यानंतर ते पुन्हा वैभववाडी येथे परत आले. सध्या ते आपल्या कुटुंबासह एका गृहसंकुलात वास्तव्यास होते. काही काळापासून ते मानसिक तणावाखाली असल्याने त्यांच्यावर वैद्यकीय उपचारही सुरू होते. दोन दिवसांपूर्वीच ते कोल्हापूरहून उपचार घेऊन परतले होते.
घटनेच्या दिवशी सायंकाळी त्यांची पत्नी स्वयंपाकात व्यस्त असताना अनिल शेटे बेडरूममध्ये गेले. बराच वेळ झाल्यानंतरही ते बाहेर न आल्यामुळे पत्नीने खिडकीतून पाहिले असता, त्यांनी पंख्याला ओढणीने गळफास घेतल्याचे दिसले. तात्काळ आरडाओरडा केल्यानंतर शेजारी धावून आले. पोलिसांना कळवण्यात आले आणि त्यांनी तातडीने दरवाजा तोडून त्यांना खाली उतरवले. वैभववाडी ग्रामीण रुग्णालयात नेण्यात आले, उपचारापूर्वीच डॉक्टरांनी त्यांना मृत घोषित केले.
शवविच्छेदनानंतर मृतदेह कुटुंबीयांच्या ताब्यात देण्यात आला. त्यांच्या पश्चात पत्नी, दोन मुली, आई-वडील असा परिवार आहे. या घटनेमुळे परिसरात हळहळ व्यक्त केली जात आहे.