मिठी नदीतील गाळ काढण्यासाठी वापरण्यात येणाऱ्या सिल्ट पुशींग पन्टुन मशीनची मुंबईच्या महापौर किशोरी पेडणेकर यांनी पाहणी करून मिठी नदी सफाई कामाचा आढावा घेतला आहे. मुंबईतील मिठी नदीच्या गाळ काढण्याचे काम वेगाने सुरु आहे. हा गाळ काढण्यासाठी महानगरपालिकेकडून अत्याधुनिक यंत्रांचा वापर करण्यात येत आहे. या कामाचा महापौरांनी आढावा घेतला आहे.

वांद्रे-कुर्ला संकुलातील एमटीएनएल कार्यालयालगतच्या मिठी नदीत येणारी माती, घाण, कचरा आणि गाळ ईत्यादी वाहून येऊन ते मिठी नदीच्या पातमुखामध्ये, तसेच मिठी नदीत जमा होतो. त्यामुळे पाण्याचा निचरा व्यवस्थित न होता गाळ साचून राहतो. गाळ न काढल्यास सायन ते कुर्ला रेल्वे स्थानकादरम्यान पूरस्थिती निर्माण होते. त्यामुळे मध्य रेल्वे सुध्दा विस्कळीत होते.पावसाळा सुरु होण्यापूर्वी आणि त्यानंतर मिठी नदीचा प्रवाह सुरळीत ठेवण्याकरीता मिठी नदी तसेच संबधीत पातमुखामधील गाळ काढणे आवश्यक आहे. हा गाळ काढण्यासाठी बृहन्मुंबई महाननगरपालिकेतर्फे मिठी नदीचे गाळ काढण्याचे काम अत्याधुनिक यंत्रसामुग्री जसे सिल्ट पुशींग पन्टुन मशीन (Silt pushing Pontoon Machine), मल्टिपर्पज अम्फिबियस पन्टुन मशीन (Multipurpose Amphibious Pontoon Machine) यासोबत पोक्लेन मशीन याद्वारे गाळ काढला जातो. यासर्व घटनेचा आढावा किशोरी पेडणेकर यांनी घेतला.