थोडक्यात
फलटण महिला डॉक्टर प्रकरण
तपासाची सूत्रे SIT कडे, सायबरकडून डेटाची तपासणी
पीएसआय बदने आणि बनकरला न्यायालयीन कोठडी
(Satara Doctor case) सातारा जिल्ह्यातील फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येच्या प्रकरणाने राज्यभरात खळबळ उडवली आहे. या घटनेत धक्कादायक बाब समोर आली असून, डॉक्टरने आत्महत्येपूर्वी आपल्या हातावरच मृत्यूस कारणीभूत असलेल्या दोन व्यक्तींची नावे लिहिली.
मृत डॉक्टरने आत्महत्येपूर्वी आपल्या हातावर सुसाईड नोट लिहिली होती, त्यात तिने धक्कादायक आरोप केले आहेत. त्या नोटमध्ये डॉक्टरने लिहिले आहे की, "PSI गोपाल बदने यांनी तिच्यावर पाच महिन्यांपासून वारंवार अत्याचार आणि लैंगिक शोषण केले, तसेच पोलीस अधिकारी प्रशांत बनकर यांनी तिला मानसिक छळ केला". त्या महिला डॉक्टरने या दोघांवर लैंगिक अत्याचार आणि मानसिक छळाचे गंभीर आरोप केले आहेत. याप्रकरणी दोन्ही आरोपींना आता 14 दिवसांची न्यायालयीन कोठडी सुनावण्यात आली आहे.
याच पार्श्वभूमीवर आता या प्रकरणातील तपासाची सूत्रे एसआयटीकडे गेली असून सायबर तज्ञांकडून डेटाची तपासणी केली जात आहे. विशेष पोलीस महानिरीक्षक डॉक्टर मनोज कुमार शर्मा यांच्या आदेशानुसार तेजस्वी सातपुते यांना थेट याप्रकरणी एसआयटी चे प्रमुख अधिकारी म्हणून पाचारण करण्यात आले आहे.