थोडक्यात
सोलापूरमध्ये कालपासून मुसळधार पाऊस पडत आहे
मुसळधार पावसामुळे इतिहासात पहिल्यांदा सीना नदीला महापूर
माढ्यातील 16, करमाळ्यातील 10 गावांत शिरलं पाणी
(Sina River Flood) सोलापूरमध्ये कालपासून मुसळधार पाऊस कोसळत आहे. सोमवारी मध्यरात्रीपासून मुसळधार पाऊस पडत असून शेतकऱ्यांच्या पीकांचे अतोनात नुकसान झालं आहे. राज्यात गेल्या काही दिवसांपासून ढगाळ वातावरणासह हलक्या सरी बरसत आहेत.
गेल्या आठवड्यात झालेल्या पावसामुळे अनेक भागात पिकांचे नुकसान झाले आहे. काही ठिकाणी पूरस्थिती निर्माण झाली होती. सोलापुरातील अक्कलकोट, बार्शी, मोहोळ तालुक्यात जोरदार पाऊस असून नदीकाठच्या गावांना सतर्कतेचा इशारा देण्यात आला आहे. याच पार्श्वभूमीवर आता सोलापूर जिल्ह्यातील ग्रामीण भागात शाळांना सुट्टी जाहीर करण्यात आली आहे.
या मुसळधार पावसामुळे इतिहासात पहिल्यांदाच सीना नदीला महापूर आला आहे. सोलापूर जिल्ह्यातील माढा आणि करमाळा तालुक्यातील सीना नदीत सध्या 2 लाख 12 हजार 651 क्युसेक इतक्या विसर्गाने पाणी प्रवाहित होत असून माढा तालुक्यातील 16 गावात तर करमाळा तालुक्यातील 10 गावात पाणी शिरले गेले आहे.
त्यामुळे साधारण 1800 नागरिकांचे स्थलांतर करण्यात आले आहे.माढा तालुक्यातील शिंगेवाडी गावात 9 जण पुरात अडकले होते. त्यांचे रेस्क्यू करण्यात प्रशासनाला यश आले आहे. माढा तालुक्यातील उंदरगावला सीना नदीच्या पाण्याचा विळखा पडला असून तालुक्यातील 16 गावांना पुराचा फटका बसला आहे. अनेक गावांतील जनजीवन विस्कळीत झाले आहे अनेक पिके पाण्याखाली गेली आहेत.