(Ladki Bahin Yojana ) लाडकी बहीण योजनेचा गैरफायदा राज्य सरकारी कर्मचारी महिलांनी घेतल्याच्या तक्रारी आल्यानंतर तपासणी करण्यात आली. या तपासणीत 2652 महिला सरकारी कर्मचाऱ्यांनी या योजनेचा गैरफायदा घेतल्याचा धक्कादायक प्रकार उघडकीस आला आहे. माहिती व तंत्रज्ञान विभागाने घेतलेल्या तपासणीतून हा प्रकार उघडकीस आला.

1 लाख 60 हजार 559 महिला व पुरुष सरकारी कर्मचाऱ्यांची युआयडी डेटा तपासणी करण्यात आली. यातून निष्पन्न झाले की 2652 महिला कर्मचाऱ्यांनी ऑगस्ट 2024 ते एप्रिल 2025 दरम्यान प्रतिमाह 1,500 रुपये प्रमाणे ‘लाडकी बहीण’ योजनेचा लाभ घेतला. याचा एकूण आर्थिक फायदा सुमारे 3 कोटी 58लाख रुपये इतका झाला. शासन निर्णयात स्पष्ट करण्यात आले आहे की, सरकारी कर्मचाऱ्यांना या योजनेचा लाभ घेता येणार नाही, तरीही संबंधितांनी अर्ज भरला आणि या योजनेचा फायदा घेतला.

याच पार्श्वभूमीवर आणखी सहा लाख कर्मचाऱ्यांची तपासणी लवकरच केली जाणार आहे, असल्याची माहिती मिळत आहे. यासोबतच तपासणीत आणखी एक महत्त्वाची बाब समोर आली. 8 लाख 85 हजार महिलांनी ‘नमो शेतकरी योजना’ आणि ‘लाडकी बहीण योजना’ दोन्हीचा लाभ घेतला.