महाराष्ट्रात सध्या लोकसभा निवडणुकीची रणधुमाळी सुरु आहे. त्यातच राजकारणातील एक मोठी बातमी समोर आली आहे. राज्यातील शिक्षक, पदवीधर मतदारसंघासाठी जाहीर झालेली निवडणूक पुढे ढकलण्यात आली आहे. निवडणुकीसाठी पुढच्या महिन्यात 10 जूनला मतदान होणार होतं. परंतु काही शिक्षक आणि पदवीधर संघटनांनी यावर आक्षेप घेतला होता. या काळात शाळांना सुट्टी असल्याने याचा मतदानावर परिणाम होईल असे शिक्षक संघटनांचं म्हणणे होते. याची दखल घेत निवडणूक आयोगाने घेतली आहे.

महाराष्ट्र शासनाच्या शिक्षण विभागाने 2 मे ते 14 जूनपर्यंत सुट्टीचा कालावधी जाहीर केला असून शाळा 15 जून नंतर सुरु होणार आहेत. तसेच 17 जून ते 20 जून पर्यंत बकरी ईदनिमित्त उर्दू माध्यमांच्या शाळांना सुट्टी असते. त्यानुसार हा निर्णय घेण्यात आला आहे. निवडणूक आयोगाने अनिश्चित काळासाठी ही निवडणूक पुढे ढकलली आहे.

दरम्यान, आता निवडणूक आयोगाने शिक्षक आणि पदवीधर मतदारसंघाची निवडणूक अनिश्चित काळासाठी पुढे ढकलण्याचा निर्णय निवडणूक आयोगाने घेतला आहे. शिक्षक भारतीचे कार्याध्यक्ष सुभाष किसन मोरे यांनी आमदार कपिल पाटील यांच्यासोबत दिल्लीत जाऊन भारत निर्वाचन आयोगाकडे मागणी केली होती. तर हायकोर्टात याचिकाही दाखल केली होती. भारत निर्वाचन आयोगाने याबाबतची प्रेस नोट जारी केली आहे.