उदय चक्रधर | भंडारा (Bhandara) - शिकारीच्या शोधात आलेला एक बिबट्या (Leopard ) चक्क वस्तीतील राहत्या घरात घुसून तब्बल 3 तास थैमान घातल्याची घटना भंडारा जिल्ह्यातील लाखांदूर तालुक्यातील पिंपळगाव/ कोहळी येथे घडली. येथील रेवनाथ परशुरामकर यांच्या घरात तब्बल 3 तास ठिय्या मांडला होता.

पिंपळगाव/ कोहळी येथील रेवनाथ विनायक परशुरामकर यांचे घर हे जंगल व शेतीला लागून असलेल्या पिंपळगावात आहे. तर पिंपळगाव हे गाव लाखांदूर अर्जुनी मार्गावर असून लाखांदूर तालुक्यातील शेवटच्या टोकावरील आणि जंगला लगत आहे. त्यामुळे येथे वन्य प्राण्याचा मुक्त संचार नेहमीच पाहायला मिळते. मात्र, शिकारीच्या शोधात असलेला एक बिबट्या येथीलच रेवनाथ परशुरामकर यांच्या घरात शिरला. बिबट्या घरात आल्याचे समजताच सर्वत्र एकच खळबळ उडाली.ही बातमी गावात पसरताच ग्रामस्थांसह तालुक्यातील जनतेने घरात घुसलेल्या बिबट्याला बघण्यासाठी पिंपळगावची वाट धरली.

दरम्यान, येथील काही ग्रामस्थांनी प्रसंगावधान साधून दरवाज्याची बाहेरून कडी लावली आणि बिबट्या घरात जेरबंद झाला. तर त्याला ग्रामस्थांच्या मदतीने जंगलाच्या दिशेने हुसकावून लावण्यात वन विभाग व पोलिस प्रश्नाला यश आले आहे. येथे या बिबट्याला बघण्यासाठी नागरिकांनी एकाच गर्दी केली होती