बातमी वाचण्यासाठी खाली स्क्रोल करा...
(Thackeray Brothers ) महापालिका निवडणुकीसाठी सर्वच राजकीय पक्ष तयारीला लागले आहेत. येत्या 15 जानेवारी 2026 रोजी महापालिका निवडणुकीसाठी मतदान होणार आहे, तर 16 जानेवारी 2026 रोजी मतमोजणी होणार असून 2869 जागांसाठी ही निवडणूक होणार आहे. यातच ठाकरे बंधूंच्या युतीची घोषणा कधी होणार याकडे सर्वांचे लक्ष लागले होते.
राजकीय वर्तुळातून यावर अनेक प्रतिक्रिया येत होत्या. याच पार्श्वभूमीवर मुंबई पालिकेसाठी ठाकरे बंधूंच्या युतीची आज घोषणा होणार आहे. काल संजय राऊत यांनी ट्विट करत माहिती दिली. आज दुपारी 12 वाजता ब्ल्यू सी हॉटेलमध्ये ठाकरे बंधूंच्या युतीची पत्रकार परिषदेत घोषणा होईल.मनसेप्रमुख राज ठाकरे आणि शिवसेना उबाठा पक्षाच्या नेत्यांची जागावाटपासंदर्भात बैठक झाली असून आता दोन्ही प्रमुख नेते एकत्र येणार आहेत.
यावेळी ठाकरे बंधू युतीची घोषणेत मात्र सावध भूमिका घेणार आहेत. जागावाटप आणि उमेदवारीबाबत आज घोषणा होण्याची शक्यता वर्तवण्यात येत आहे, टप्प्याटप्प्याने उमेदवाराना एबी फॉर्म देण्यात येणार असून या प्रक्रियेदरम्यान प्रत्येक उमेदवाराच्या मतदारसंघात पोहोचणार आहेत.
घोषणा करण्याच्या आधी ठाकरे बंधू शिवसेनाप्रमुख बाळासाहेब ठाकरे यांना एकत्र येऊन अभिवादन करणार असून या पत्रकार परिषदेमध्ये दोन्ही बंधू काय बोलतात याकडे सर्वांचे लक्ष लागले आहे. आज मुंबईच्या विकासाचा जाहीरनामा देखील प्रसिद्ध करणार असल्याची माहिती मिळत आहे.
Summary
अखेर ठाकरे बंधूंच्या युतीचा मुहूर्त ठरला
आज दुपारी 12 वाजता ठाकरे बंधूंच्या युतीची घोषणा
वरळीतील ब्लू सी बँक्वेटमधून युतीची घोषणा करणार