थोडक्यात
फलटण महिला डॉक्टर प्रकरण
'प्रकरणाची केस फास्टट्रॅक कोर्टात चालवावी'
छत्रपती संभाजीनगरातील डॉक्टरांची मागणी
(Satara Doctor case) सातारा जिल्ह्यातील फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येच्या प्रकरणाने राज्यभरात खळबळ उडवली आहे. या घटनेत धक्कादायक बाब समोर आली असून, डॉक्टरने आत्महत्येपूर्वी आपल्या हातावरच मृत्यूस कारणीभूत असलेल्या दोन व्यक्तींची नावे लिहिली.
मृत डॉक्टरने आत्महत्येपूर्वी आपल्या हातावर सुसाईड नोट लिहिली होती, त्यात तिने धक्कादायक आरोप केले आहेत. त्या नोटमध्ये डॉक्टरने लिहिले आहे की, "PSI गोपाल बदने यांनी तिच्यावर पाच महिन्यांपासून वारंवार अत्याचार आणि लैंगिक शोषण केले, तसेच पोलीस अधिकारी प्रशांत बनकर यांनी तिला मानसिक छळ केला". त्या महिला डॉक्टरने या दोघांवर लैंगिक अत्याचार आणि मानसिक छळाचे गंभीर आरोप केले आहेत. याप्रकरणी दोन्ही आरोपींना आता 14 दिवसांची न्यायालयीन कोठडी सुनावण्यात आली आहे.
या सर्व घटनेमुळे राज्यात संतापाची लाट पसरली आहे. याच पार्श्वभूमीवर आता छत्रपती संभाजीनगरातील घाटी रूग्णालयातील OPD आज बंद ठेवण्यात येणार आहे. डॉक्टर संपदा मुंडे आत्महत्या प्रकरणाची केस फास्टट्रॅक कोर्टात चालवावी, कुटुंबीयांना मोबदला मिळावा, दोषींवर कारवाई व्हावी या मागणीसाठी छत्रपती संभाजी नगरातील घाटी रूग्णालयातील OPD आज बंद ठेवण्यात येणार असून आपत्कालीन आणि आयसीयू सेवा मात्र अखंडित सुरू राहणार असल्याची माहिती मिळत आहे.