(Kalyan Crime) कल्याण शहरातील एका खासगी रुग्णालयात काम करणाऱ्या रिसेप्शनिस्ट तरुणीवर एका परप्रांतीय तरुणाने केलेल्या अमानुष मारहाणीने शहरात खळबळ माजवली आहे. संबंधित घटनेचा व्हिडिओ सीसीटीव्हीत कैद झाल्यानंतर नागरिकांमध्ये तीव्र संताप उसळला आहे.
या प्रकरणातील मुख्य आरोपी गोपाल झा याला अखेर पोलिसांनी अटक केली असून, मनसेच्या कार्यकर्त्यांनी त्याला पकडून पोलिसांच्या हवाली केलं. या घटनेनंतर मनसेने आक्रमक भूमिका घेतली असून पक्षाच्या नेत्यांनी थेट पीडित तरुणीची भेट घेतली व तिला न्याय मिळवून देण्याचा शब्द दिला आहे.
पोलिसांनी दिलेल्या माहितीनुसार, गोपाल झा हा पूर्वीही गुन्हेगारी प्रकरणांत अडकलेला असून, यावेळी त्याच्यासोबत आणखी तीन जणांना ताब्यात घेण्यात आलं आहे. त्याचा भाऊ रणजीत झाला देखील या प्रकरणात अटक केली आहे. या हल्ल्यानंतर नागरिकांनी पोलिसांकडे आरोपीला तातडीने अटक करण्याची जोरदार मागणी केली होती.
सीसीटीव्ही फुटेजमध्ये दिसतं की, संबंधित तरुणी रुग्णांची नोंदणी करत असताना आरोपीने तिला शिवीगाळ केली आणि नंतर तिच्यावर लाथाबुक्क्यांनी अमानुषपणे हल्ला केला. तिला ओढून क्लिनिकबाहेर फरफटत नेलं गेलं. या प्रकरणामुळे स्थानिक जनतेमध्ये प्रचंड असंतोष असून आरोपींवर कठोर कारवाई करण्याची मागणी होत आहे.