अहमदाबाद : गुजरातमधील बोताड जिल्ह्यात कथितरित्या बनावट दारु सेवनामुळे अनेकांचा मृत्यू झाला असून, मृतांचा आकडा आता 28 वर पोहोचला आहे. एका वरिष्ठ पोलीस अधिकाऱ्याने मंगळवारी ही माहिती दिली. गुजरातचे पोलीस महासंचालक आशिष भाटिया यांनी गांधीनगरमध्ये पत्रकारांना सांगितलं की, ही दारू अत्यंत विषारी मिथाइल अल्कोहोलपासून बनवण्यात आली होती. ते म्हणाले खून आणि इतर गुन्ह्यांच्या आरोपाखाली 14 लोकांविरुद्ध तीन एफआयआर नोंदवण्यात आले असून त्यापैकी बहुतेकांना ताब्यात घेण्यात आलं आहे. ही बाब सोमवारी सकाळी उघडकीस आली. बोताडच्या रोझीद गावासह अन्य काही ठिकाणी राहणाऱ्या काही लोकांची प्रकृती खालावल्यानं त्यांना बरवाला परिसर आणि बोताड शहरातील सरकारी रुग्णालयात दाखल करण्यात आलं. (28 people have died and 60 others became ill from drinking altered liquor)

भाटिया यांनी सांगितलं की, बनावट दारूच्या सेवनामुळे आतापर्यंत २८ जणांचा मृत्यू झाला आहे. त्यापैकी 22 बोताड जिल्ह्यातील वेगवेगळ्या गावातील, तर सहा शेजारील अहमदाबाद जिल्ह्यातील होते. याशिवाय 45 हून अधिक लोक सध्या भावनगर, बोताड आणि अहमदाबाद येथील रुग्णालयात दाखल आहेत. भाटिया म्हणाले, "फॉरेन्सिक विभागाकडून असं सांगण्यात आलं आहे की, पीडितांनी मिथाइल अल्कोहोलचं सेवन केलं होतं." गुजरात दहशतवाद विरोधी पथक (ATS) आणि अहमदाबाद गुन्हे शाखा देखील या प्रकरणाचा तपास करत आहे.

दरम्यान, गुजरातच्या दौऱ्यावर असलेले दिल्लीचे मुख्यमंत्री अरविंद केजरीवाल यांनी सोमवारी राज्यात दारूबंदी लागू असूनही अवैध दारूची विक्री होत असल्याचा आरोप केला. या वर्षाच्या अखेरीस राज्यात विधानसभा निवडणुका होणार आहेत. त्यामुळे यासह अनेक मुद्दे विरोधकांसाठी आयतं कोलित ठरणार आहेत.