मुंबईमधील वांद्र्याच्या लिंकिंग रोडवरील क्रोमा शोरूममध्ये पहाटे भीषण आग लागली आहे. यादरम्यान अग्निशमन दलाच्या 15 गाड्या घटनेची माहिती कळताच तत्काळ घटनास्थळी दाखल झाल्या आणि आगीवर नियंत्रण मिळवण्याचे शर्थिचे प्रयत्न करत आहे. घटनास्थळावर अग्निशमन दल, मुंबई पोलिस, अदानी इलेक्ट्रिसिटी, पीडब्ल्यूडी आणि स्थानिक वॉर्डचे कर्मचारी आहेत.
आग इतकी भीषण आहे की आगीमध्ये शोरूमचे मोठे नुकसान झाले आहे. बीएमसीकडून आलेल्या माहितीनुसार पहाटेच्या वेळेस वांद्रे येथील लिंकिंग रोडवरील तीन मजली बिझनेस पार्क असलेल्या लिंक स्क्वेअर मॉलच्या तळमजल्यावर असेलल्या क्रोमा शोरूममध्ये भीषण आग लागली. दरम्यान या आगीत कोणतीही जीवितहानी झालेली नाही. या आगीमुळे आजूबाजूच्या परिसरात नागरिकांनी गर्दी केली असून खळबळ उडाली आहे.
तसेच या आगीमुळे शोरूममधून काळ्या धुराचे लोट आणि आगीच्या ज्वाला बाहेर येत असल्यामुळे शोरुमच्या बाहेर रस्त्यावर वाहतूक कोंडी निर्माण झाली आहे. दरम्यान नागरिकांमध्ये गोंधळ उडत असल्यामुळे वाहतूक पोलिसांकडून वाहतूक सुरळीत करण्याचे प्रयत्न सुरू आहेत. अग्निशमन दलाच्या विनंती नंतर एनडीआरएफ तुकडीला पाचारण केले. तसेच चार तासांपासून अग्निशमन दलाचे आग विझवण्याचे प्रयत्न सुरु असून नजीकच्या इमारतींमधील रहिवाशांना सुरक्षित स्थळी हलवण्यात येत आहे.