बिहारमधील आगामी विधानसभा निवडणुकांसाठी संपूर्ण देशाचं लक्ष लागलं आहे. पुण्यातील रुद्र रिसर्च अँड अ‍ॅनालिटिक्स या संस्थेने एक सर्वेक्षण केले आहे, ज्यात बिहारमधील मतदारांचा कल समजून घेतला. या संस्थेने 2024 च्या लोकसभा निवडणुकीसाठी महाराष्ट्रातील एक्झिट पोल अचूक ठरवला होता. सर्वेक्षण पद्धतीनुसार, 15 हजारपेक्षा अधिक मतदारांशी संवाद साधला गेला. यामध्ये मोदी आणि नीतीश सरकारच्या कामगिरीवर 56 टक्के मतदार मोदी सरकारला आणि 42 टक्के मतदार नीतीश कुमार सरकारला समाधानी असल्याचं दिसून आलं. बेरोजगारी आणि स्थलांतराच्या समस्यांमुळे दोन्ही सरकारांबद्दल असमाधान देखील दिसून आलं.
मुख्यमंत्री म्हणून तेजस्वी यादव, नीतीश कुमार, चिराग पासवान आणि प्रशांत किशोर यांना मतदारांची पसंती मिळाली आहे. विशेषत: तेजस्वी यादव यांचा युवा मतदारांमध्ये प्रभाव दिसून आला, तर नीतीश कुमार यांची महिला मतदारांमध्ये लोकप्रियता आहे. त्यानुसार, राजदला 28 टक्के, भाजपाला 25 टक्के, जेडीयूला 16 टक्के आणि काँग्रेसला 7 टक्के कौल मिळाला आहे. महिला मतदारांमध्ये जेडीयू-भाजप युतीला अधिक पसंती मिळते, विशेषतः नीतीश कुमार यांच्या महिलांसाठी आणलेल्या योजनांमुळे. मात्र, बेरोजगारी आणि स्थलांतर यासारख्या मुद्द्यांवर तेजस्वी यादव सरकारविरुद्ध वातावरण निर्माण करू शकतात. 2020 च्या विधानसभा निवडणुकीप्रमाणेच, आगामी निवडणुकीतही हे मुद्दे राजकारणावर प्रभाव टाकू शकतात.