मोहम्मद पैगंबर यांच्याविरोधात आक्षेपार्ह वक्तव्य करणाऱ्या भाजप प्रवक्त्या नुपूर शर्मा, जिंदाल यांच्याविरोधात आता मुस्लिम समाज आक्रमक झाला असून, देशभरात वेगवेगळ्या ठिकाणी यावरुन निदर्शनं करण्यात आली आहेत. राज्यातील सोलापूर, जिल्ह्यात एमआयएम पक्षाच्या नेतृत्वाखाली मुस्लिमांनी मोर्चा काढला असून दुसरीकडे दिल्लीत सुद्धा निदर्शनं करण्यात येत आहेत. शुक्रवारची नमाज अदा करण्यात आल्यानंतर मुस्लिम समाजाचे लोक एकत्र आले असून, त्यांनी भाजप विरोधात घोषणाबाजी सुरु केली आहे.
नुपूर शर्मा आणि नवीन जिंदाल यांनी मोहम्मद पैगंबर यांच्याबद्दल आक्षेपार्ह वक्तव्य केल्यानंतर जगभरातून या वक्तव्याचा निषेध केला जातोय. आखाती देशांनी थेट भारताला माफी मागण्याचं आवाहन केलं होतं. त्यामुळे भारताला माफी सुद्धा मागावी लागली. त्यानंतर भाजपने नुपूर शर्मा आणि नवीन जिंदाल यांच्यावर कारवाई करत त्यांची भाजपच्या मूळ सदस्य पदावरुनच हकालपट्टी केली आहे. मात्र त्यानंतर देखील आता मुस्लिम समाजाने एकत्र येत त्यांच्यावर कारवाईची मागणी केली आहे.