महाराष्ट्राचे उपमुख्यमंत्री अजित पवार यांचे विमान अपघातात निधन झाल्यानंतर विमान सुरक्षा आणि तांत्रिक समस्यांवर चर्चा अधिकच तीव्र झाली आहे. याच पार्श्वभूमीवर, एअर इंडियाच्या बोईंग ७८७ ड्रीमलाइनर विमानाच्या इंधन नियंत्रण स्विचमध्ये पुन्हा बिघाड झाल्याची माहिती समोर आली आहे. या तांत्रिक समस्येमुळे विमानाचे उड्डाण थांबवावे लागले आणि विमान ग्राउंड करण्यात आले. एअर इंडियाकडून दिलेल्या माहितीनुसार, विमानातील एका वैमानिकाने इंधन स्विचमध्ये तांत्रिक बिघाड झाल्याची तक्रार केली होती. प्राथमिक तपासणीनंतर विमान ग्राउंड करण्यात आले. या विमानात सुमारे २०० प्रवासी होते. पायलटच्या तक्रारीनंतर विमान कंपनीने तातडीने संपर्क साधला आणि नागरी विमान वाहतूक महासंचालनालय (DGCA) यांना घटनाक्रमाची माहिती दिली.
DGCA च्या निर्देशानुसार, एअर इंडियाने आपल्या सर्व बोईंग ७८७ विमानांवरील इंधन नियंत्रण स्विचची तपासणी सुरू केली. तपासणीत इतर कोणत्याही विमानात समस्या आढळलेली नाही. विमान सुरक्षित असून, प्रवाशांचे जीवनधोक्यात आलेले नाही. तथापि, या घटनेने विमान प्रवाशांमध्ये चिंता निर्माण केली आहे आणि सुरक्षा निकषांबाबत चर्चेला गती दिली आहे. सेफ्टी मॅटर्स फाउंडेशनच्या माहितीनुसार, एअर इंडिया फ्लाइट AI132 च्या कर्मचाऱ्यांनी नोंदवले की, बोईंग ड्रीमलाइनरच्या डाव्या इंजिनचा इंधन स्विच चालू करताना तो रन स्थितीतून कट ऑफ स्थितीत हलू लागला. यामुळे उड्डाणादरम्यान इंजिन अनवधानाने बंद पडण्याची शक्यता होती. अशा प्रकारच्या तांत्रिक समस्यांमुळे उड्डाणात अनपेक्षित धोके निर्माण होऊ शकतात, ज्यावर त्वरित कारवाई करणे अत्यंत आवश्यक आहे.
एअर इंडियाचे हे विमान रविवारी रात्री ९:१९ वाजता लंडनच्या हीथ्रो विमानतळावरून निघाले आणि सोमवारी सकाळी ११:५४ वाजता बंगळुरूमध्ये उतरले. विमान कंपनी घटनाक्रमावर त्वरित लक्ष ठेवत असून DGCA सोबत सहयोग करत आहे. तथापि, नागरी विमान वाहतूक महासंचालनालयाकडून अद्याप अधिकृत प्रतिक्रिया आलेली नाही. गेल्या जून महिन्यात अहमदाबादमध्ये बोईंग ७८७ ड्रीमलाइनर अपघाताची चौकशी सुरू असताना ही घटना समोर आली. तज्ज्ञांचे मत आहे की, अशा तांत्रिक समस्या उड्डाणाच्या सुरक्षिततेसाठी गंभीर धोका ठरू शकतात. एअर इंडियाने आपल्या ताफ्यातील सर्व ड्रीमलाइनर विमानांची तपासणी आणि इंधन स्विच दुरुस्ती करण्यासाठी तातडीने पावले उचलली आहेत.
एअर इंडियाच्या प्रवाशांनी देखील या घटनेवर चिंता व्यक्त केली आहे. विमान प्रवास सुरक्षित असला तरी, अशा तांत्रिक समस्यांमुळे विमान कंपन्यांनी अतिरिक्त खबरदारी घेणे गरजेचे आहे. तज्ज्ञांचा असा अंदाज आहे की, या घटनांमुळे विमान सुरक्षा नियमांचा पुनरावलोकन होऊ शकतो आणि भविष्यातील अपघात टाळण्यासाठी उपाययोजना करण्यात येतील.