शिवसेना उद्धव बाळासाहेब ठाकरे गटाचे नेते अखिल चित्रे यांनी एकनाथ शिंदे गटावर सडकून टीका केली आहे. त्यांनी शिंदे गटाच्या बॅनरचा फोटो एक्स हँडलवर ट्वीट केला असून यामध्ये ही मोदी-शहांची सेना असल्याचे म्हटले आहे. शिंदे गटाच्यावतीने महाराष्ट्राचा हापूस आंबा महोत्सवाच्या उद्घाटन समारंभाचा बॅनर लावण्यात आला आहे. या बॅनरवर पंतप्रधान नरेंद्र मोदी, मुख्यमंत्री देवेंद्र फडणवीस, उपमुख्यमंत्री अजित पवार आणि उपमुख्यमंत्री एकनाथ शिंदे दिसत आहे. शिवाय खासदार श्रीकांत शिंदे आणि खासदार रविंद्र वायकर हेदेखील बॅनरवर दिसत आहेत. हा कार्यक्रम ३० एप्रिल रोजी दिल्लीतील नविन महाराष्ट्र सदनात पार पडणार असून शिंदे गटाच्या खासदारांनी हा महोत्सव आयोजित केला आहे.
बॅनरवरील चेहरे पाहून अखिल चित्रे यांनी एकनाथ शिंदे गटाला डिवचले आहे. एरव्ही लोकांना भावनिक साद घालताना हिंदुहृदयसम्राट बाळासाहेब ठाकरे आणि धर्मवीर आनंग दिघे यांच्या नावाचा उल्लेख किंवा फोटोंचा वापर केला जातो. मात्र काही ठिकाणी सोयीस्करपणे त्यांच्या फोटोंचा विसर पडतो. त्यामुळे ही मोदी-शहांची सेना असल्याचे चित्रेंनी म्हटले आहे.
काय आहे ट्वीटमध्ये
ही बाळासाहेब ठाकरेंची नव्हे तर...मोदी शहांची सेना!
ही हिंदुहृदयसम्राट बाळासाहेब ठाकरेंची नव्हे तर...
मोदी शहांची सेना !
एरव्ही मतांसाठी हिंदुहृदयसम्राट बाळासाहेबांची आणि धर्मवीर दिघेसाहेबांची तसबीर वापर करणाऱ्यांना आता सोयीस्करपणे त्यांच्या फोटोचा विसर.
ह्यांच्या गटात एकापेक्षा एक मस्केबाज चमकू भरलेत.
#नासकेआंबे