महाराष्ट्रातील एसटी महामंडळाच्या बसेसची दूरवस्था वारंवार चर्चेत येत असतानाच आणखी एक भीषण अपघात घडला आहे. जळगाव जिल्ह्यातील पारोळा–भडगाव मार्गावर आयशर ट्रकने एसटी बसला जोरदार धडक दिली. या अपघातात एका प्रवाशाचा जागीच मृत्यू झाला असून तब्बल 25 प्रवासी जखमी झाले आहेत.

कसा झाला अपघात?

मिळालेल्या माहितीनुसार, धुळे–सोयगाव मार्गावर एसटी महामंडळाची बस प्रवाशांसह जात असताना समोरून भरधाव वेगाने येणाऱ्या आयशर ट्रकची बसला भीषण धडक बसली. धडकेची तीव्रता एवढी होती की बसचा पुढील भाग अक्षरशः चेंदामेंदा झाला. अपघातानंतर बसमधील प्रवाशांमध्ये मोठा आक्रोश उसळला. काही प्रवासी शेतात लोळत पडलेले दिसले, तर अनेक जण गंभीर जखमी अवस्थेत बसमध्ये अडकले होते.

तातडीचे मदतकार्य

अपघाताची माहिती मिळताच स्थानिक नागरिकांनी आणि पोलिसांनी घटनास्थळी धाव घेतली. तातडीने बचावकार्य सुरू करून जखमींना पारोळा येथील कुटीर रुग्णालयात दाखल करण्यात आले. डॉक्टरांच्या माहितीनुसार, जखमींपैकी दोन प्रवासी गंभीर अवस्थेत आहेत.

वाहतूक ठप्प, पोलिस तपास सुरू

या अपघातामुळे काही वेळ पारोळा–भडगाव रस्त्यावर वाहतूक ठप्प झाली होती. अपघातग्रस्त बस आणि ट्रक बाजूला केल्यानंतर वाहतूक सुरळीत करण्यात आली. पोलिसांनी अपघाताचा गुन्हा दाखल करून पुढील तपास सुरू केला आहे.

प्रवाशांच्या सुरक्षिततेवर पुन्हा प्रश्नचिन्ह

एसटी बसची दुरवस्था हा नवा मुद्दा नाही. सरकार दरवर्षी हजारो नवीन बसेस रस्त्यावर आणण्याचे आश्वासन देत असले तरी प्रवाशांचा जीव अजूनही धोक्यात आहे. वारंवार होणाऱ्या अपघातांमुळे प्रवाशांच्या सुरक्षिततेवर गंभीर प्रश्नचिन्ह निर्माण झाले आहे.