Aadhar and Pan Linking : जर अजूनही तुम्ही पॅन कार्डला आधार जोडले नसेल, तर ही माहिती तुमच्यासाठी महत्त्वाची आहे. केंद्र सरकारने स्पष्ट केले आहे की 31 डिसेंबर 2025 पर्यंत पॅन आणि आधार एकमेकांशी जोडले नाहीत, तर 1 जानेवारी 2026 पासून पॅन कार्ड वापरात राहणार नाही.

आज जवळपास प्रत्येक नागरिकाकडे पॅन आणि आधार ही दोन्ही ओळखपत्रे आहेत. कर भरणे, बँक व्यवहार, गुंतवणूक यांसारख्या अनेक कामांसाठी ही कागदपत्रे आवश्यक असतात. त्यामुळे पॅन आधारशी लिंक नसेल, तर पुढे मोठ्या अडचणी येऊ शकतात. सरकारने दिलेल्या मुदतीत ही प्रक्रिया पूर्ण करणे आवश्यक आहे.

अर्थ मंत्रालयाने याबाबत अधिकृत माहिती दिली असून, आधार नोंदणी क्रमांकाच्या आधारे पॅन काढलेल्या नागरिकांना आता थेट आधार क्रमांक आयकर विभागाकडे देणे बंधनकारक करण्यात आले आहे. कर व्यवस्थेत पारदर्शकता आणणे आणि बनावट पॅन रोखणे हा या निर्णयामागचा उद्देश आहे.

पॅन कार्ड बंद झाले तर काय अडचणी येतील?

जर तुमचा पॅन निष्क्रिय झाला, तर अनेक कामे अडतील. आयकर विवरणपत्र भरता येणार नाही. बँकेतील अनेक व्यवहार थांबू शकतात. शेअर्स, म्युच्युअल फंड, मालमत्ता खरेदी-विक्री यासारख्या व्यवहारांवरही मर्यादा येतील. त्यामुळे वेळेत पॅन आणि आधार जोडणे खूप गरजेचे आहे.

पॅन पुन्हा सुरू करण्यासाठी पैसे द्यावे लागतील

जर पॅन कार्ड बंद झाले तरी घाबरण्याची गरज नाही. ते पुन्हा सुरू करता येते. मात्र यासाठी आधार लिंक करताना 1000 रुपयांचा दंड भरावा लागतो. हा अतिरिक्त खर्च टाळण्यासाठी ठरलेल्या तारखेआधीच लिंकिंग करणे फायद्याचे ठरेल.

घरी बसून करा पॅन-आधार लिंक

पॅन आणि आधार जोडण्यासाठी कुठेही जाण्याची गरज नाही. आयकर विभागाच्या ई-फायलिंग वेबसाइटवर जाऊन काही सोप्या टप्प्यांत हे काम करता येते. वेबसाइटवर दिलेल्या लिंकवर पॅन आणि आधारची माहिती टाकावी लागते. त्यानंतर मोबाईलवर आलेला ओटीपी भरल्यावर प्रक्रिया पूर्ण होते. काही मिनिटांतच तुमचे पॅन आणि आधार लिंक होतात.

थोडक्यात

1. महत्त्वाची माहिती: पॅन कार्डला आधार अजून जोडले नसेल तर खबरदारी घ्या

2. शासनाची सूचना: 31 डिसेंबर 2025 पर्यंत लिंक करणे आवश्यक

3. परिणाम: 1 जानेवारी 2026 पासून पॅन कार्ड वापरात राहणार नाही

4. टार्गेट: सर्व पॅनधारकांना त्वरित लिंक करणे आवश्यक