अभिनेता सलमान खानच्या वांद्रे येथील घरावर गोळीबार करण्यात आला होता. या गोळीबार प्ररणामध्ये मुंबई पोलिसांच्या गुन्हे शाखेने 5 जणांना अटक केली आहे. आता या गोळीबार प्रकरणी आणखी एका आरोपीला अटक केली आहे. हरियाणाच्या फतेहाबादवरून गुन्हे शाखेने ही अटक केली आहे. या आरोपीला मोक्का कोर्टात हजर करण्यात येणार आहे. या प्रकरणी एकूण अटक करण्यात आलेल्या आरोपींची संख्या सहा वर गेली आहे.

विकी चौधरी, सागर पाल, मोहम्मद चौधरी, सोनू चंदर आणि अनुज थापन अशी याआधी अटक करण्यात आलेल्या आरोपींची नावे आहेत. आज सकाळी सहाव्या आरोपीला अटक केली आहे. या आरोपीचे नाव हरपाल सिंग असे आहे. तो 37 वर्षांचा असल्याची माहिती पोलीस सूत्रांनी दिली.

14 एप्रिल 2024 रोजी पहाटे पाच वाजण्याच्या सुमारास दोन दुचाकीस्वारांनी अभिनेता सलमान खानच्या घराबाहेर गोळीबार केला होता. या घटनेनंतर मोठी खळबळ उडाली. मुंबई पोलिसांनी तातडीने या प्रकरणाचा तपास सुरू केला. या घटनेची जबाबदारी तुरुंगात असलेला गँगस्टर लॉरेन्स बिष्णोई याचा भाऊ अनमोल बिष्णोई याने घेतली. घटनास्थळापासून काही अंतरावर पोलिसांना गुन्ह्यात वापरलेली दुचाकी सापडली होती. सीसीटीव्ही फूटेजमध्ये पोलिसांना आरोपींचे चेहरे दिसले. या घटनेच्या 72 तासांच्या आत मुंबई पोलिसांनी गुजरातमधून आरोपींच्या मुसक्या आवळल्या.