मुंबईतील रेल्वे प्रवाशांसाठी शनिवार-रविवारी काळात मोठा खोळंबा उभा राहणार आहे. पश्चिम रेल्वे आणि मध्य रेल्वेच्या काही मार्गांवर मेंटेनन्स आणि पुल री-गर्हरिंगसाठी मेगा ब्लॉक्स घेण्यात येणार आहेत. त्यामुळे प्रवाशांनी आपल्या प्रवासात जास्त काळ लक्ष देणे गरजेचे आहे.
पश्चिम रेल्वेच्या ग्रँट रोड ते मुंबई सेंट्रल दरम्यान अप आणि डाऊन धिम्या मार्गावर शनिवारी रात्री ११ वाजेपासून रविवारी दुपारी १२ वाजेपर्यंत ब्लॉक लागू राहणार आहे. या कालावधीत पूल क्रमांक ५ ची री-गर्हरिंग केली जाणार आहे. यामुळे या कालावधीत १४५ लोकल सेवा रद्द करण्यात आल्या आहेत. ब्लॉकदरम्यान मुंबई सेंट्रल ते चर्चगेट दरम्यान अप धिम्या मार्गावरील लोकल सेवेला अप जलद मार्गावरून पर्यायी मार्गदर्शन दिले जाईल. तसेच चर्चगेट ते माहीम स्थानकांदरम्यानची धिम्या मार्गावरील वाहतूक जलद मार्गावरून सुरू राहील.
याच ब्लॉकदरम्यान प्रभादेवी पूलाचे छत कापण्याचे काम सुरू होईल. पुढील काही दिवसांत आणखी एक ब्लॉक घेण्यात येणार असून, त्यात पूलवरील गर्डर काढण्याचे काम केले जाणार आहे. पश्चिम रेल्वेचे मुख्य जनसंपर्क अधिकारी विनीत अभिषेक यांनी प्रवाशांना माहिती दिली आहे की, ब्लॉकदरम्यान प्रवाशांनी वैध तिकिटावर वांद्रे किंवा दादर स्थानकातून माहीम, माटुंगा रोड, प्रभादेवी, लोअर परेल आणि महालक्ष्मी स्थानकांमार्फत विरुद्ध दिशेने प्रवास करण्याची व्यवस्था आहे.
मध्य रेल्वेवरही मोठा खोळंबा पाहायला मिळणार आहे. माटुंगा आणि मुलुंड थिम्या मार्गावर रविवारी सकाळी ११ ते दुपारी ३:५५ या कालावधीत मेगाब्लॉक घेण्यात आला आहे. या दरम्यान विद्याविहार, कांजूरमार्ग आणि नाहूर स्थानकांवर लोकल उपलब्ध राहणार नाही, त्यामुळे प्रवाशांना जास्त काळ प्रतीक्षा करावी लागू शकते.
याशिवाय, ट्रान्स हार्बर मार्गावर ठाणे आणि वाशी/नेरुळ स्थानकांदरम्यान सकाळी ११:१० ते दुपारी ४:१० या कालावधीत ब्लॉक असल्याने अप व डाऊन ट्रान्स-हार्बरवरील लोकल सेवा बंद राहतील. प्रवाशांनी या कालावधीत पर्यायी मार्गांचा विचार करून आपले प्रवासाचे नियोजन करणे आवश्यक आहे.
पश्चिम व मध्य रेल्वे प्रशासनाने प्रवाशांना अधिक सुरक्षित आणि सुलभ प्रवासासाठी पर्यायी मार्गांची व्यवस्था केली असून, प्रवाशांनी तिकीट, वेळापत्रक आणि स्थानकांची माहिती आधीच तपासून प्रवास करावा, अशी सूचना दिली आहे. मुंबईतील या मोठ्या ब्लॉक्समुळे प्रवाशांना काही अडचणी येणार असल्या तरी, भविष्यातील रेल्वे सुरक्षितता व सुधारणा यासाठी हा उपक्रम अत्यंत महत्त्वाचा आहे.