spy ship : चीन आपले गुप्तचर जहाज युआन वांग 5 श्रीलंकेला पाठवत आहे. श्रीलंकेतील हंबनटोटा बंदरात आठवडाभर असेल. चीनच्या या निर्णयामुळे भारतामध्ये चिंता वाढली आहे. या जहाजातून चीन भारतीय नौदलाच्या महत्त्वाच्या तळांसह भारताच्या अणुऊर्जा प्रकल्पाची माहिती गोळा करू शकतो. श्रीलंकेला कर्जाच्या जाळ्यात अडकवून चीनने महत्त्वाचे हंबनटोटा बंदर लीजवर घेतले आहे. (chinese spy ship yuan wang 5 set to dock in sri lanka)

चीनच्या हेर जहाजामुळे भारतात चिंता का वाढली...

युआन वांग 5 हे जहाज ताशी 35 किलोमीटर वेगाने श्रीलंकेच्या दिशेने जात आहे. 11 ऑगस्ट रोजी हंबनटोटा येथे पोहोचण्याची शक्यता आहे. 17 ऑगस्टपर्यंत येथे असेल. हे एक गुप्तचर आणि अंतराळ संशोधन जहाज आहे. चीन त्याचा वापर स्पेस ट्रॅकिंग, सॅटेलाइट कंट्रोल आणि रिसर्च ट्रॅकिंगसाठी तसेच इतर देशांच्या हेरगिरीसाठी करतो.

युआन वांग 5 जहाजाची रेंज 750 किलोमीटरपेक्षा जास्त आहे. हंबनटोटा बंदरातून, केरळ, तामिळनाडू आणि आंध्र प्रदेशमध्ये असलेल्या भारताच्या प्रमुख मोक्याच्या तळांची माहिती घेऊ शकते. ते कलापक्कम आणि कूडनकुलम अणुऊर्जा प्रकल्प तसेच अणु संशोधन केंद्राचीही हेरगिरी करू शकते.

युआन वांग 5 हे चिनी सैन्याचे जहाज आहे. हे चीनच्या स्ट्रॅटेजिक सपोर्ट फोर्स युनिटद्वारे चालवले जाते. हे युनिट स्पेस, सायबर आणि इलेक्ट्रॉनिक वॉरफेअरवर काम करते. युआन वांग 5 हे तिसऱ्या पिढीचे ट्रॅकिंग जहाज आहे. 29 सप्टेंबर 2007 रोजी चिनी सैन्यात सामील करण्यात आले.

युआन वांग 5 हे अत्यंत अत्याधुनिक क्षेपणास्त्र श्रेणीचे उपकरण जहाज आहे. हे क्षेपणास्त्र आणि रॉकेटचा मागोवा घेते. त्याचे शक्तिशाली अँटेना आणि इलेक्ट्रॉनिक उपकरणे बॅलिस्टिक क्षेपणास्त्राचा मागोवा घेतात आणि ते कोठे डागले गेले आणि त्याचे लक्ष्य काय आहे. अमेरिका, रशिया, भारत आणि फ्रान्सकडेही अशी जहाजे आहेत.

चीनचे म्हणणे आहे की युआन वांग 5 हे अंतराळ संशोधनासाठी आहे आणि ते इंधन आणि इतर आवश्यक पुरवठा घेण्यासाठी श्रीलंकेतील हंबनटोटा येथे थांबेल. मात्र, खरे कारण काही वेगळेच आहे. सूत्रांनी दिलेल्या माहितीनुसार, भारताचे मुख्य नौदल तळ आणि आण्विक संयंत्रांची हेरगिरी करण्यासाठी चीन हे जहाज श्रीलंकेला पाठवत आहे.

या जहाजाला हायटेक इव्हस्ड्रॉपिंग उपकरणे बसवण्यात आली आहेत. श्रीलंकेच्या बंदरावर उभं राहून ते भारताच्या अंतर्गत भागापर्यंतची माहिती गोळा करू शकते. पूर्व किनारपट्टीवरील भारतीय नौदल तळ आणि चांदीपूर येथील इस्रोचे प्रक्षेपण केंद्र या जहाजाच्या हेरगिरीच्या कक्षेत असेल.