हिमाचल प्रदेश विधानसभा निवडणुकीची मतमोजणी सुरू आहे. निवडणुकीचे निकाल लागण्यापूर्वी काँग्रेसला घोडेबाजार होण्याची भीती वाटत आहे. मिळालेल्या माहितीनुसार काँग्रेसला भीती वाटत आहे की, भाजप आपल्या विजयी आमदारांना त्यांच्यात सामील करुन घेऊ शकते, ही भीती ‘ऑपरेशन लोटस’ लक्षात घेऊन काँग्रेसने हिमाचल प्रदेशातील आमदारांना राजस्थानला पाठवण्याची योजना आखली आहे. सूत्रांनी दिलेल्या माहितीनुसार, छत्तीसगडचे मुख्यमंत्री भूपेश बघेल आणि ज्येष्ठ नेते भूपेंद्र सिंह हुडा यांच्यावर जबाबदारी सोपवण्यात आली आहे.
मिळालेल्या माहितीनुसार, काँग्रेस सरचिटणीस प्रियंका गांधी वड्रा या परिस्थितीवर वैयक्तिकरित्या लक्ष ठेवून आहेत आणि त्या आज शिमला येथे पोहोचण्याची शक्यता आहे. आज निवडणुकीच्या निकालानंतर जनता पुन्हा भाजपला संधी देणार की काँग्रेसला हे ठरणार आहे.
हिमाचल प्रदेशमध्ये १२ नोव्हेंबरला मतदान झाले. यावेळी राज्यातील 55 लाख मतदारांपैकी सुमारे 75 टक्के मतदारांनी मतदानाचा हक्क बजावला. हिमाचल प्रदेशमध्ये ६८ सदस्यांची विधानसभा आहे. या निवडणुकीत एकूण 412 उमेदवार रिंगणात होते, त्यांच्या भवितव्याचा आज फैसला होणार आहे. काँग्रेसला आपल्या विजयाची खात्री असताना भाजप पुन्हा सरकार स्थापन करण्याचा दावा करत आहे.