नॅशनल हेराल्ड प्रकरणी (National Herald) आज काँग्रेस अध्यक्षा सोनिया गांधी (Sonia Gandhi) यांची आज पुन्हा चौकशी होणार आहे. याचपार्श्वभूमीवर सोनिया गांधींच्या ईडी चौकशीविरोधात काँग्रेसकडून मुंबईत जोरदार आंदोलन करण्यात आले. तसेच बोरिवली स्थानकात सौराष्ट्र एक्स्प्रेस रोखण्यात आली. दरम्यान पोलिसांकडून आंदोलकांना रुळावरून हटवण्याचा प्रयत्न करण्यात आला आहे.
काँग्रेस अध्यक्षा सोनिया गांधी यांची याआधी मागील आठवड्यात गुरुवारी चौकशी करण्यात आली होती. जवळपास साडे तीन तासांच्या चौकशीनंतर सोनिया गांधी यांना घरी जाण्यास ईडीने परवानगी दिली. दरम्यान नॅशनल हेराल्ड प्रकरणी सोनिया गांधी यांच्या अगोदर काँग्रेस नेते खासदार राहुल गांधी यांचीही ईडीने चौकशी केली होती. राहुल गांधी यांची पाच दिवस 50 तास चौकशी केली होती. सोनिया गांधी यांचीही चौकशी त्या दरम्यान होणार होती. मात्र, त्यांना कोरोनाची लागण झाली होती. त्यानंतर त्यांनी चौकशी पुढे ढकलण्याची विनंती ईडी अधिकाऱ्यांना केली होती.
दरम्यान, सोनिया गांधी यांच्या ईडी चौकशीविरोधात काँग्रेसकडून देशभर निषेध आंदोलन करण्यात येणार आहे. तर मुंबईतही मंत्रालयाजवळच्या गांधी पुतळ्यासमोर काँग्रेसकडून सत्याग्रह आंदोलन करण्यात येणार आहे.