Ladki Bahin Yojana : मुख्यमंत्री माझी लाडकी बहीण या राज्य सरकारच्या महत्वाकांक्षी योजनेअंतर्गत महिलांना दरमहा 1500 रुपये दिले जातात. मात्र योजनेचा गैरफायदा घेतल्याच्या अनेक तक्रारी समोर आल्यानंतर आता सरकारने महत्वाचा निर्णय घेतला आहे. योग्य आणि पात्र महिलांनाच या योजनेचा लाभ मिळावा यासाठी सर्व लाभार्थींना e-KYC करणे बंधनकारक करण्यात आले आहे.
योजनेच्या लाभार्थींना e-KYC करण्याबाबत अनेक शंका निर्माण झाल्या होत्या. काही महिलांना ही प्रक्रिया नेमकी कशी करायची याबाबत गोंधळ होता. या पार्श्वभूमीवर महिला व बालकल्याणमंत्री आदिती तटकरे यांनी आपल्या एक्स अकाउंटवरून यासंदर्भातील संपूर्ण माहिती दिली आहे.
तटकरे यांनी सांगितल्यानुसार, सर्वप्रथम लाभार्थींनी https://ladakibahin.maharashtra.gov.in या संकेतस्थळाला भेट द्यावी लागेल. त्यानंतर मुखपृष्ठावर असलेल्या e-KYC बॅनरवर क्लिक केल्यानंतर संबंधित फॉर्म उघडेल. या फॉर्ममध्ये लाभार्थींनी आधार क्रमांक आणि कॅप्चा टाकून Send OTP वर क्लिक करायचे आहे. आधारशी संलग्न मोबाईलवर आलेला OTP टाकून Submit केल्यानंतर पुढील प्रक्रिया सुरू होईल.
सिस्टम तपासून पाहील की e-KYC आधीच पूर्ण झाली आहे का. जर पूर्ण झाली असेल, तर “e-KYC आधीच पूर्ण झाली आहे” असा संदेश दिसेल. जर पूर्ण झाली नसेल, तर आधार क्रमांक पात्र यादीत आहे का याची पडताळणी केली जाईल. त्यानंतर लाभार्थींनी पती किंवा वडिलांचा आधार क्रमांक टाकून OTP द्वारे त्याची खात्री करावी लागेल. पुढे जाताना महिलांनी आपला जात प्रवर्ग निवडून काही अटींना संमती द्यावी लागेल. यात कुटुंबातील कोणताही सदस्य शासकीय नोकरीत कायमस्वरूपी कार्यरत नाही किंवा निवृत्तीनंतर पेन्शन घेत नाही, तसेच कुटुंबातील केवळ एक विवाहित आणि एक अविवाहित महिला योजनेचा लाभ घेत आहे, याची खात्री करून Submit करावे लागेल.
संपूर्ण प्रक्रिया पूर्ण झाल्यानंतर स्क्रीनवर “Success – तुमची e-KYC पडताळणी यशस्वीरित्या पूर्ण झाली आहे” असा संदेश दिसेल. महिलांनी वेळ न दवडता ही प्रक्रिया पूर्ण करावी, असे आवाहन आदिती तटकरे यांनी केले आहे.